Gonzalo Caballero ironiza coa foto dos "perdedores" Feijóo e Casado e di que o seu retorno ao centro "non é crible"

O secretario xeral do PSdeG, Gonzalo Caballero, criticou o "postureo" que "tenta manexar" o PP tras quedar "fóra de xogo" nas eleccións xerais do pasado domingo, cun acto no que coincidirán en Galicia o líder estatal, Pablo Casado, e o presidente dos populares galegos, Alberto Núñez Feijóo, e que para os socialistas non é máis que a foto "de dous perdedores" celebrando "a derrota histórica" do seu partido.

Así o sinalou o líder dos socialistas galegos, tras acudir á presentación da candidatura do partido no municipio. Alí, reprochou ao PP que tente "mostrar un retorno ao centro político que non é crible", sobre todo despois de aceptar "os votos" de Vox en Andalucía.

Por tanto, se quixesen ofrecer "certa credibilidade", deberían instar o Goberno de Andalucía a renunciar aos "votos da ultradereita", instou Caballero, quen advertiu de que o PP busca este lavado de cara "porque non lle deron as contas" para investir a Casado comopresidente. "Se non, seguiría abrazado a voz para ter un presidente da dereita co acordo do tres dereitas".

Caballero asegurou, así, que o PSOE seguirá "traballando duro para ser o muro de contención" fronte a aqueles que buscan "pór en risco os procesos de construción" realizados en Europa, polo que pedirán "unha mobilización masiva" nas próximas eleccións europeas para evidenciar que os cidadáns non queren "unha dereita reaccionaria".

Preguntado sobre se cre que Casado deixará o cargo á fronte do PP, o líder do PSdeG considerou que esta formación "ten un problema político profundo", despois de que o pasado domingo o PSOE conseguise ser primeira forza política en Galicia e no Estado. "Non sei se Feijóo lle pedirá a dimisión a Casado ou se Casado dirá a Feijóo que o seu tempo en Galicia tamén acabou".