A área sanitaria de Pontevedra e O Salnés pechará o 12% das camas hospitalarias no verán

A área sanitaria de Pontevedra e O Salnés manterá un 12% das súas camas inoperativas durante este verán, unhas 89, mentres que terá 520 operativas no Complexo Hospitalario Universitario de Pontevedra (CHUP) --o 87% do seu total-- e 108 no Hospital do Salnés --o 90%--.

Segundo informou a área sanitaria de Pontevedra e O Salnés, a través do Plan de Adecuación de recursos asistenciais programado para este verán, manterá operativo "o 89% dos seus recursos asistenciais globais durante os meses do próximo período estival".

"Esta planificación, realizada en base ao estudo pormenorizado da afluencia de pacientes durante esta época e que leva a cabo e replanifica cada ano, permitirá asegurar as necesidades de cobertura asistencial de acordo coa previsión de demanda na área sanitaria de Pontevedra e O Salnés, así como executar un uso racional dos recursos asistenciais", explicaron as mesmas fontes.

En función do nivel de ocupación de camas rexistrado o verán do pasado ano 2018, que alcanzou no CHUP un 76% (456 camas) e no Hospital do Salnés un 68% (82 camas), a xerencia sanitaria desta área manterá operativas 520 camas e 108, respectivamente.

A previsión estival desta EOXI para o verán de 2019 "contempla unha marxe de dispoñibilidade global de 90 camas" nos hospitais desta área sanitaria integrada --64 desas camas estarán dispoñibles no CHUP e os 26 restantes no Hospital do Salnés--.

"Esa marxe de dispoñibilidade supera notablemente o nivel de ocupación de camas rexistrado o verán pasado nos centros hospitalarios da área", subliñan as mesmas fontes do Sergas.

DATOS 2018

En concreto, os datos do pasado ano 2018 reflicten que o número de camas ocupadas no período estival foi de 456 no Complexo Hospitalario Universitario de Pontevedra, "quedando sen utilización case 150 camas respecto do total".

Pola súa banda, no Salnés o número de camas ocupadas foi de 86, mentres que quedaron sen utilización case 35 camas respecto do total.

"Estas cifras reiteran de novo que a poboación acode en menor medida aos centros do sistema sanitario público de Pontevedra e O Salnés nesta época, xa que determinadas patoloxías descenden de maneira considerable, por exemplo os procesos respiratorios. Por iso é polo que se rexistre unha menor ocupación de camas nos centros hospitalarios da EOXI", indica a xerencia sanitaria.

Con todo, a EOXI de Pontevedra e O Salnés lembra que "están dispoñibles a totalidade das camas en todo momento na área sanitaria, quedando operativas de modo inmediato cando sexa necesario".

Neste sentido, como "medida preventiva", engade, no caso de que o nivel de ocupación hospitalaria superase o 90%, a dirección da área sanitaria "dispón dun plan de continxencia específico, que dotará de persoal en menos de dúas horas aquelas camas que fosen necesarias", polo que garante a "asistencia de continuidade en todo momento". "A actividade hospitalaria de xuño a setembro non se paraliza en ningún momento", subliña.

Ademais, concreta que en caso de producirse alertas de ondas de calor, os pacientes ingresados en Medicina Interna do Hospital Provincial sexan trasladados á hospitalización das plantas de Cirurxía e Pneumoloxía do Hospital Montecelo "para evitar as altas temperaturas".