Por E.P. | OURENSE | 10/05/2019 | Actualizada ás 15:57
O secretario xeral do PSdeG, Gonzalo Caballero, ironizou con que o PP levará "un trompazo" nas próximas eleccións municipais e europeas do 26 de maio igual que o pasado 28 de abril, na cita das xerais, ao volver apostar pola presenza do expresidente Mariano Rajoy nesta carreira electoral.
O exdirixente popular abriu a campaña das xerais en Pontevedra e para este venres, tamén primeiro día de carreira electoral, se impluicou e programou a súa visita a distintos puntos, entre eles, Ourense. "Abriu a campaña das xerais en Pontevedra e recibiu un trompazo e agora vén abrir a campaña e vai recibir un trompazo nas municipais, porque xa representa o pasado e necesitamos un novo pulo e un novo impulso fronte ao retroceso da dereita", augurou Gonzalo Caballero.
O líder socialista desprazouse este primeiro venres de campaña ao municipio ourensán do Barco de Valdeorras, cuxo alcalde é "referencia" para todos, xa que tamén é presidente da Federación Galega de Municipos e Provincias (Fegamp). "Un alcalde consolidado que leva moitos anos traballando, que ten a mesma enerxía desde que empezou e ten todo o impulso, e está disposto a seguir dando o mellor de si", destacou, en declaracións aos medios, Caballero.
Non en balde, o dirixente socialista puxo en valor o municipio de O Barco como un dos insignes do seu partido en Galicia. "Abrimos esta campaña destacando que os socialistas queremos municipios e concellos de progreso, fronte á incompetencia e que reclamamos o voto para os candidatos socialistas", proclamou.
"A OPCIÓN NATURAL"
E é que, no ámbito de política municipal, Caballero criticou que o presidente da Xunta, Alberto Núñez Feijóo, "abandonou os concellos, non conectou cos espazos urbanos e abandonou especificamente os gobernos pequenos e do rural". "O PP esqueceuse ao longo do Goberno de Feijóo da importancia dos concellos e da política municipal", aseverou. Fronte a iso, Gonzalo Caballero reivindicou que os socialistas "son a opción natural de progreso para poder solucionar os problemas dos concellos pequenos e do medio rural, e fronte ao abandono".
Pola súa banda, o alcalde e candidato á reelección, Alfredo García, asegurou que tanto el como o resto da candidatura preséntanse "coa mesma ilusión do primeiro mandato": "Con moito máis coñecemento dos problemas e realidades de Ou Barco, pero coas mesmas ganas de traballar por O Barco que demostramos estes 20 anos".
O rexedor de O Barco subliñou que os socialistas coñecen os "problemas" que poidan pervivir. "Sabemos que hai que seguir, que é o momento da segunda transformación do Barco", manifestou, antes de destacar os 63 millóns de euros que se investirán na circunvalación de O Barco, a "obra máis importante da comarca, que vai xerar riqueza, emprego e dinamismo económico no próximos tres anos".
EUROPEAS
Ademais do arranque municipal, tamén comezou a carreira para as europeas, nas que o galego Nicolás González Casares concorre no posto oito da lista que encabeza Josep Borrell. "Non podemos esquecer as eleccións europeas, todos os cidadáns temos que votar aos nosos representantes e os socialistas representamos a mellor opción de progreso", manifestou.
Gonzalo Caballero fixo votos por "unha Europa con contido social, dos pobos" que respecte a "os mercados económicos", pero que antepoña os intereses dos cidadáns aos económicos. "Notros, os socialistas de O Barco e de toda España cremos nos 'Estados Unidos de Europa', para que os intereses da cidadanía e a xente estean por diante dos intereses duns poucos", ratificou, polo seu lado, Alfredo García.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.