Por Europa Press / Redacción | SANTIAGO DE COMPOSTELA | 10/05/2019 | Actualizada ás 19:04
O Transcantábrico Clásico, un dos trens turísticos de Renfe, inicia este sábado a súa tempada de 2019 con 14 viaxes e todo luxo de detalles, segundo destacou o xefe de área de Trens Turísticos de Renfe, Javier Checa.
Checa resaltou "a exclusividade, experiencia e a calidade" que ofrece este tren, que se converteu en referente mundial nesta exclusiva maneira de facer turismo e que inicia este sábado, 11 de maio, a súa tempada 2019.
Nunha presentación na estación de tren de Ferrol, á que asistiu a subdelegada do Goberno na Coruña, Checa detallou que nesta proposta que na súa modalidade de completa "dura oito días, sete noites, dórmese sempre a bordo do tren, xa que é o hotel e o centro das actividades, xa que parte das comidas e ceas realízanse no seu interior, mentres que outra parte faise nos establecementos máis exclusivos que se atopan polo camiño".
A nova tempada estenderase ata o 12 de outubro, na que realizará un total de 14 viaxes, limitados a 44 viaxeiros por traxecto, debido ás limitacións que ofrece o convoi por cuestións de espazo.
ALTA SATISFACCIÓN
En 2018, este tren alcanzou unha ocupación superior ao 91% e un grao de satisfacción dos usuarios superior ao 90%. A viaxe no Transcantábrico Clásico ten unha duración de oito días, entre Santiago e León, pero existe a posibilidade de realizar percorridos máis curtos e de menor custo, entre Compostela e Santander, de cinco días e de Santander a León, de catro días.
En todo momento desprázase en paralelo un autobús que é o encargado de achegar os viaxeiros a distintos puntos do programa. O tren que presta este servizo combina a beleza de principios do século XX e a seguridade do século XXI, segundo subliña Renfe.
O prezo é de 3.700 euros por persoa en habitación dobre, cun suplemento de 1.850 euros se se viaxa só. Existe tamén unha oferta destinada a maiores de 55 anos que consiste nun desconto do 10% para calquera das saídas previstas para a tempada 2019.
Se a viaxe é de cinco días, o prezo ascende a 2.220 euros e se é de catro a 1.700 euros, sempre por persoa e compartindo habitación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.