En Marea propón plans municipais para suplir carencias de transporte no ámbito rural
Por E.P. | OURENSE | 12/05/2019 | Actualizada ás 16:22
A formación de En Marea defendeu a necesidade de impulsar plans municipais que suplan as actuais carencias da zona rural galega, en especial, no que afecta o transporte, as gardarías e á conexión a Internet.
En actos de campaña celebrados en Trives e Manzaneda, o portavoz de En Marea, Luís Villares, denunciou o "fracaso" do Plan de Transporte da Xunta e as dificultades que existen no rural para realizar desprazamentos.
Ante isto, a formación aposta por impulsar plans de carácter municipal e comarcal que posibiliten unha mobilidade cómoda e áxil, que permita comunicar as localidades coa cabeceira da comarca e os distintos lugares coa capital do concello.
CONEXIÓN A INTERNET
Pero o portavoz de En Marea tamén incidiu na necesidade de que o ámbito rural conte con acceso a Internet que permita "reivindicar o futuro" destas zonas. A ausencia de conexión a Internet, subliñou, dificulta o asentamento empresarial e o impulso a alternativas laborais.
Así, comprometeuse a "presionar para que Internet chegue a todos os puntos". Entre as súas propostas, tamén comprometeu que a formación se compromete a tratar de suplir a falta de prazas de gardarías, con servizos municipais para nenos de 0 a 3 anos.
TRIVES
Luís Villares estivo acompañado do candidato de Son de Trives-En Marea, Jorge Vázquez e do alcalde e candidato á reelección de Son de Manzaneda-En Marea, Félix Domínguez, así como do candidato de En Marea-Compromiso por Europa Davide Rodríguez.
En Marea, agregou, aposta por Concellos abertos, conectados coas necesidades reais da cidadanía e activamente implicados na mellora da calidade de vida dos veciños. Un modelo que "dista moito" da situación actual de Trives, cunha xestión "desastrosa", segundo Jorge Vázquez e "unha situación económica crítica, cunha débeda que case está ao mesmo nivel que o orzamento anual".
O candidato en Trives reivindicou a necesidade dun cambio a nivel municipal que consiga que a localidade "volva ser o centro de comarca que sempre foi". Vázquez criticou o "abandono sistemático de todas as actividades económicas, culturais e turísticas dun goberno que non está a coidar os distintos sectores" e apelou á necesidade dun cambio que leve "aire novo".
