Por Europa Press / Redacción | SANTIAGO DE COMPOSTELA | 13/05/2019 | Actualizada ás 13:44
A Fundación Pública Urxencias Sanitarias de Galicia-061 recomenda beber máis líquido do habitual e evitar a actividade no exterior nas horas máis calorosas nestas xornadas de influencia dunha masa de aire cálido africano.
Segundo manifestaron fontes do 061 a Europa Press, débese beber máis líquido do habitual, sobre todo auga e zumes de froita lixeiramente fríos, e comer verduras e froitas en abundancia, así como evitar as comidas copiosas.
Sobre a vestimenta, o 061 aconsella usar roupa de tecidos naturais, lixeira e folgada, de cores claras, chapeus, lentes de sol e cremas protectoras solares. "O calzado deberá ser cómodo, fresco e transparente", engade.
No interior dos edificios recomenda permanecer, se é posible, en espazos ventilados ou acondicionados, utilizando as habitacións máis frescas da vivenda. Mentres, no exterior dos inmobles aconsella evitar na medida do posible as actividades nas horas máis calorosas, reducir a actividade física, procurar buscar sombras e, cando se estacione o coche, non permanecer no vehículo.
Ademais, indica que cando se vaia á praia convén tomar o sol de forma progresiva durante os primeiros días, evitando as horas do mediodía e as primeiras da tarde e "nunca quedar durmido ao sol".
GOLPE DE CALOR
No caso de sufrir síntomas relacionados coa exposición excesiva das altas temperaturas como mareos, alteracións no comportamento, sensación de atoramiento, cambras, sensación de febre, convulsións ou perda do coñecemento, o 061 advirte de que podería tratarse dun golpe de calor.
Por iso, ante esta situación ou calquera outro síntoma do que se teña dúbida, destaca que se debe chamar ao 061 "e será atendido por profesionais sanitarios que lle facilitarán as indicacións máis adecuadas a seguir segundo a situación".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.