Por Europa Press / Redacción | SANTIAGO DE COMPOSTELA | 14/05/2019 | Actualizada ás 16:06
A portavoz nacional do BNG, Ana Pontón, desprazouse neste quinto día de campaña electoral para as municipais e europeas ao municipio coruñés de Rianxo, onde gobernan os nacionalistas capitaneados por Adolfo Muíños, candidato á reelección. Alí, advertiu de que o "modelo BNG" é a alternativa ao "bipartidismo" de PP e PSOE e tamén ao "rupturismo" das candidaturas das mareas, que "non souberon xestionar".
En contraposición, e durante unha visita na que coñeceu de primeira man un proxecto de vivenda social do goberno local de Rianxo, sinalou que este é un concello "máis de como o modelo BNG transforma en positivo, mellorando a vida das persoas".
"Un modelo que funciona e que é a única garantía de cambio real nos concellos fronte a fórmulas fracasadas do bipartidismo de sempre e fronte aos que viñan cambialo todo pero nin deixan unha xestión eficiente", sinalou Pontón, quen instou, por iso, a todas as persoas que reclaman un cambio transformador desde os concellos a que o 26M collan a papeleta do BNG.
Nesta liña insistiu en que os galegos que aposten por un cambio real nos concellos teñen "a súa opción" no BNG, porque esta formación é "a garantía dun cambio real nos concellos".
Así, en contraposición ao "bipartidismo" e aos gobernos das mareas, Pontón defendeu que "onde goberna o BNG, transforma vilas e cidades, cun proxecto sólido, que mellora a vida das persoas e demostra con feitos que logra concellos cun urbanismo sustentable, ben xestionados, honestos, feministas e con orgullo da identidade propia, a cultura e a lingua".
APOSTA POLAS POLÍTICAS DE INCLUSIÓN
"Esta é a proposta do Bloque para o 26M: estender un modelo municipal de referencia, un modelo que funciona e sendo garantía de cambio real", salientou a dirixente nacionalista, quen puxo como exemplo dun "goberno a favor das persoas" o proxecto de vivenda social en aluguer, que visitou este martes.
De feito, indicou que o goberno local, a pesar de non ter competencias en vivenda, aposta por políticas de inclusión social, e de integración que "non deixan a ninguén atrás e que tenden a man ás persoas e familias con menos recursos".
Unha proposta que está, dixo, nas "antípodas" do PP, que "salvaba a banca mentres desafiuzaba miles de persoas sen alternativa algunha". Fronte a iso, o BNG defende unha política social de vivenda, con medidas como que os inmobles da Sareb se transfiran ás administracións públicas "para poder cubrir demandas sociais de vivenda", unha actuación que debería ser asumida polo Estado.
Pontón tamén denunciou como o PP "no que milita Feijóo", onde tiña responsabilidades de goberno, "vendeu miles de vivendas de protección a fondos voitre sen ningunha garantía para as familias ou deixando sen posibilidade de emanciparse á xente nova que non pode pagar un aluguer aos elevados prezos de mercado fronte aos seus salarios".
HABERÁ UNHA SEGUNDA FASE
Pola súa banda, o alcalde e candidato, Adolfo Muíños, destacou a importancia deste proxecto de rehabilitación de vivendas. Neste sentido, destacou que se trata da restauración dunhas antigas vivendas de mestres que levan 50 anos abandonadas, "pero que agora cobran nova vida para facilitarlle unha vivenda digna", con aluguer social, a familias con poucos recursos ou vítimas de desafiuzamentos.
Respecto diso, o candidato avanzou que levará a cabo unha segunda fase que completará a rehabilitación das antigas casas de mestres e anunciou que dispoñen dunha parcela que ofrecerá para a construción de vivendas a prezos accesibles.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.