Por E.P. | A CORUÑA | 15/05/2019 | Actualizada ás 18:50
Axentes municipais detiveron na Coruña a dous homes como supostos autores de senllos delitos de violencia de xénero. Un deles ameazou con matar á súa parella diante dos axentes, segundo informa a Policía Local.
Sobre as 01,20 horas do día 14, unha patrulla desprazouse ao barrio de Monte Alto, onde unha muller, de 64 anos, alertara de que a súa parella quería agredila. Á chegada dos axentes, explicoulles que o home chegara en estado ebrio, que a insultou e lle deu varios golpes e empuxóns, ensinándolles as marcas que tiña de días anteriores.
Tamén lles explicou que mantiñan unha relación desde había 15 anos e que feitos así eran habituais, pero que non denunciara antes por medo a represalias. O home, ao que atoparon en estado de embriaguez, negou os feitos e acusou á muller de mentir para quedar co seu diñeiro. Con todo, posteriormente, achegouse a ela para dicirlle "mañá voute matar", momento no que o home, de 66 anos, foi detido.
OUTRO DETIDO NA ZAPATEIRA
Mentres, sobre as 23,41 horas do día 13, unha patrulla da Policía Local desprazouse a un domicilio da Zapateira, tras manifestar unha muller que a súa parella chegara a casa moi violento e tentase agredila. Unha vez no lugar, os axentes viron ao home sentado nun banco e sangrando polo seu brazo dereito. Aos axentes, explicoulles que discutira coa súa parella e que só quería ir durmir.
A muller, de 35 anos, explicoulles que o home chegou cun amigo e que quixo acceder, de forma agresiva, á vivenda, onde estaban os seus dous fillos. Ela negouse ante o seu estado, momento no que o home, segundo explicou, deu un forte golpe a unha das xanelas, que fracturou. Despois, empuxouna e deulle varias patadas na perna, momento no que interveu o amigo. Finalmente, os axentes procederon á detención do home, de 37 anos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.