Rescatado o condutor dun turismo tras envorcar despois de saír da vía en Ourense

Os servizos de emerxencias rescataron este xoves de madrugada ao condutor dun turismo despois de envorcar o seu vehículo tras saírse da vía no termo municipal de Ourense.

Segundo informou o 112 Galicia, o sinistro tivo lugar sobre as 1,30 horas na rúa de Rabo de Galo, en Ourense. Foron varios os particulares que chamaron ao Centro Integrado de Atención ás Emerxencias (CIAE) para informar o accidente.

O vehículo saíu da vía cando circulaba pola estrada N-525 e envorcou, o que dificultou o acceso ao único ocupante do turismo, sinalou o 112. Alertados polo 112 Galicia, acudiron ao lugar do sinistro os servizos sanitarios, os Bombeiros de Ourense, a Policía Local e o servizo de mantemento da estrada. Os membros de Protección Civil da localidade tamén foron avisados por se fose necesaria a súa intervención.

Finalmente, os efectivos do Servizo de Prevención Extinción de Incendios e Salvamento confirmaron que foi necesario o uso do material de excarceración. Unha vez liberado, o condutor ferido foi evacuado a un centro hospitalario por persoal sanitario.

O servizo de bombeiros nunha actuación