O PSOE denuncia "negociacións" entre PP e Democracia Ourensana para manter a Deputación e facer alcalde a Jácome

O candidato do PSOE á alcaldía da cidade de Ourense, Rafael Rodríguez Villarino, alertou este xoves de supostas "negociacións entre Manuel Baltar e o líder de Democracia Ourensana para manter ao presidente da Deputación e darlle a alcaldía a Gonzalo Jácome, a cambio de sacrificar ao candidato do PP, Jesús Vázquez".

"Entendemos que Ourense non pode ser utilizada como moeda de cambio para manter unha rede caciquil na Deputación provincial e dar resposta, a título persoal, aos desexos dunha persoa por liderar o Concello", manifestou.

Así o explicou este xoves o tamén secretario provincial do PSdeG-PSOE acompañado polo ex portavoz do PSOE de Madrid, Antonio Miguel Carmona e doutros membros da candidatura socialista.

Neste contexto, aludiu a que "por primeira vez na historia da Deputación treme a cadeira de Manuel Baltar --presidente provincial do PP-- que, na súa desesperación, está disposto a sacrificar o alcalde do PP quen, doutra banda, non fixo nada no últimos catro anos".

Rafael Rodríguez Villarino solicitoulle a Manuel Baltar e Gonzalo Pérez Jácome que ofrezan "explicacións urxentes". "Queremos ver como lle explican á cidadanía que o mellor é seguir as aspiracións do presidente da Deputación, por herdanza do seu pai condenado en firme por colocar a 104 persoas, e as ansias persoais de Jácome para converterse en alcalde", asegurou.

O candidato do PSOE tamén afirmou "non estar disposto a chegar ao Concello e ter liortas e á poboación abandonada". Pediu aos candidatos doutras formacións que "decidan se queren seguir pisando Ourense ou sumarse ao PSOE para arrombar a cidade".

Por último, lembrou a necesidade de transmitirlle á xente o valor do seu voto. "Un voto que vale para elixir a alcaldía do Concello de Ourense e para que cambie a presidencia da Deputación provincial".

CARMONA CONFÍA EN CAMBIAR A BALTAR

Pola súa banda, o ex-portavoz do PSOE en Madrid, Antonio Miguel Carmona estivo arroupando a Rafael Rodríguez Villarino porque considera que "ten nas súas mans o cambio político que necesita Ourense".

"Ourense é unha cidade que leva catro anos sen orzamentos, algo que poño como exemplo nas miñas clases na Facultade de Económicas, e isto co PSOE cambiará", sinalou Carmona. "Os socialistas faremos uns orzamentos como principal instrumento político e requisito mínimo para vertebrar unha cidade", engadiu.

Durante a súa intervención, quixo facer "unha homenaxe á película 'O Reino' gravada sobre outros elementos pero que "en Ourense ten a súa correlación coa herdanza de Baltar desde 1987 da Deputación". "Sei que o PSOE vai gañar a Deputación e acabar coa rede baltariana".