O PSOE proporá a Feijóo unha nova relación cos concellos no vindeiro pleno do Parlamento

A sanidade, con dúas proposicións de lei que impulsan BNG e PSdeG e outras iniciativas de toda a oposición, centrará o próximo pleno do Parlamento de Galicia que se celebrará a semana que vén, despois do parón polas eleccións municipais deste domingo 26 de maio.

De feito, cos resultados recentes do domingo e no que o PSOE se ve en alza e con posibilidades de recuperar alcaldías, o portavoz parlamentario socialista, Xoaquín Fernández Leiceaga, proporá na pregunta ao presidente da Xunta, Alberto Núñez Feijóo, un novo marco de relacións cos municipios galegos para impulsar proxectos pendentes.

O PSdeG, que despois das eleccións municipais incorporará ao seu líder, Gonzalo Caballero, á Cámara galega, fará ver a Feijóo que se van a constituír "novos gobernos" locais e provinciais e que queda "un ano de lexislatura autonómica" para que "reflexione sobre a necesidade dunhas novas pautas de relacións" coas entidades locais.

Así, mencionou que está "paralizada" a área metropolitana de Vigo, hai "problemas" coa intermodal da Coruña, iniciativas locais pendentes en Santiago de Compostela.... "É o momento de que a Xunta modifique o chip e sería o momento de establecer un marco de colaboración e non de enfrontamento", apuntou Leiceaga. De novo sobre sanidade, o portavoz socialista tamén deu a coñecer a iniciativa lexislativa que se debaterá a próxima semana e que suporá, se sae adiante a súa tramitación, a modificación da Lei de Garantías e a Lei de Saúde.

A proposta inclúe fixar un número máximo diario de consultas e procesos asistenciais para os sanitarios galegos, un catálogo de probas diagnósticas que poidan solicitar os facultativos de Atención Primaria, e darlle rango legal á figura das xerencias de Atención Primaria, "suprimidas polo PP".

"MOITO RUÍDO E POUCAS NOCES"

Con iso, preténdese "establecer os compromisos adiantos polo Sergas como norma legal", despois do acordo no último pleno de incrementar os recursos para sanidade procedentes do superávit, 17 millóns para este ano. Leiceaga sinalou que a sanidade pública ten hoxe en día "190 millóns de euros e 1.246 facultativos menos que en 2009". "Moito ruído e poucas noces, poucos recursos en atención primaria", denunciou o deputado socialista, quen tamén avanzou outras iniciativas no pleno neste ámbito, como a referida ao futuro do transporte sanitario urxente.

Unha cuestión que tamén levará o BNG á sesión plenaria da semana que vén, na que igualmente introduciu unha proposición de lei para reformar os orzamentos e impulsar un plan de mellora da Atención Primaria con 273 millóns de euros, ante o "recorte" na sanidade que cifrou en 182 millóns de euros nos orzamentos de 2019. "É necesario reverter os recortes do PP", incidiu.

Olalla Rodil, que lembrou que leste mesmo martes houbo protestas do persoal eventual, apuntou que a sanidade "non se arranxa nun consello técnico" e agregou que os "anuncios o PP son insuficientes", con 102 millóns en tres anos. "A Xunta conta con recursos económicos suficientes para dotar dos medios necesarios á sanidade pública", aseverou a parlamentaria nacionalista, quen explicou que o incremento de 273 millóns de euros supón un 20 por cento máis do orzamento asignado neste momento.

Entre outras medidas, o BNG propón incrementar o número de profesionais para que cada facultativo teña unha cota máxima de 1.250 cartóns sanitarios, cubrir o cento por cento das baixas ou mellorar os equipamentos nos centros de saúde, así como implementar un sistema de formación que se adapte á realidade o sistema sanitario, tendo en conta as próximas xubilacións.

Pola súa banda, o portavoz de En Marea tamén avanzou iniciativas en materia sanitaria, xa que a formación reclamará estabilidade laboral para os profesionais, ante o "30 por cento de temporalidade". Esta situación "impide planificar un proxecto de vida e repercute na calidade do servizo, ao dificultar que médico e paciente se coñezan".

PREGUNTAS AO PRESIDENTE

Na sesión plenaria, o presidente da Xunta, Alberto Núñez Feijóo, deberá responder as preguntas da oposición. Á marxe da pregunta socialista na que pedirá un marco de relacións novo cos concellos, tamén terá que responder sobre política de vivenda (a cargo do BNG) e acerca da eventualidade dos traballadores de servizos públicos fundamentais de Galicia (a cargo de En Marea).

O viceportavoz e secretario xeral do PP galego, Miguel Tellado, confirmou pola súa banda que a próxima sesión plenaria incluirá o debate de totalidade da lei de administración dixital de Galicia e a comparecencia do conselleiro de Medio Rural, José González, para abordar o plan de prevención e defensa contra os incendios forestais.