Bugallo cualifica de "sucia" a campaña de Compostela Aberta, con "mentiras nas redes sociais"

O candidato do PSOE á Alcaldía de Santiago, Xosé Sánchez Bugallo, contrapuxo este venres a súa campaña "propositiva" á de Compostela Aberta, que cualificou de "sucia" e de ter a súa base "en mentiras nas redes sociais".

No último día de campaña, no que pediu o apoio de todos os composteláns para ter un Santiago "forte", o aspirante socialista foi moi crítico coa acción de Compostela Aberta nestes últimos 15 días.

Así, asegurou que "gran parte" do persoal que se ocupa de "atender as redes sociais" da formación liderada por Martiño Noriega é "persoal pagado por todos os cidadáns de Santiago e a cargo dos orzamentos do Concello".

"En lugar de servir á cidadanía están a servir para facer campañas baseadas en mentiras, falsidades, en especulacións... Eles verán o que fan", manifestou.

SEN ENTRAR "NESE XOGO"

Tras iso, Bugallo asegurou que a súa candidatura nunca "quixo entrar nese xogo". "Sempre fixemos unha crítica razoada e documentada de todas as cousas que expomos e ao mesmo tempo, propositiva", subliñou.

Dito isto, destacou que ao longo da campaña cada día presentou unha proposta programática para dar solución aos problemas da cidade.

Respecto diso, explicou que foi "moi critico" co labor do goberno de Compostela Aberta por considerar que foron "catro anos perdidos", de "falta de xestión de servizos, dos investimentos e das prestacións sociais".

Tamén censurou a "opacidade" do equipo de Martiño Noriega. "Hai dez anos Santiago estaba no posto 22 entre as cidades máis transparentes de España. Hoxe está no 60. Hai unha década ocupaba o primeiro posto entre as cidades galegas. Hoxe o cuarto ou o quinto", apuntou.

ENQUISAS

Ademais, preguntado polas enquisas, Bugallo destacou que "o partido" do 26 de maio dispútase entre el mesmo e Martiño Noriega e situou fóra da batalla ao candidato á Alcaldía polo Partido Popular, Agustín Hernández.

"O único que non cambiou foron os 17 escanos do centro cara á esquerda e o oito do centro para a dereita", sinalou Bugallo, que incide que "a decisión se tomará entre eses 17".