Por Europa Press / Redacción | SANTIAGO DE COMPOSTELA | 24/05/2019 | Actualizada ás 15:34
Un grupo duns 40 persoeiros da sociedade santiaguesa, entre os que figura a ex-tenente de alcalde da capital galega Encarna Otero ou o actor Miguel de Lira, expresaron a través dun manifesto o seu apoio ao actual rexedor e aspirante á reelección por Compostela Aberta, Martiño Noriega.
"Compostela Aberta é a única garantía dun goberno de esquerdas, social e que loite por recuperar o ben común. Hai cousas que só se van facer se Martiño Noriega é alcalde, como a municipalización da auga", reza o manifesto.
O texto está asinado por varias decenas de persoas do ámbito social, sindical, cultural e político da capital galega. Destacan a ex-tenente de alcalde de Santiago co BNG, Encarna Otero, a académica da RAG Marilar Aleixandre, a profesora da Universidade de Santiago Alba Nogueira ou dous dos referentes da compañía teatral Chévere, o actor Miguel de Lira e o director Xesús Ron.
Así, o manifesto defende que Compostela Aberta é unha candidatura "que non lle debe nada aos bancos, grandes contratas, promotoras inmobiliarias ou grupos mediáticos" e que por esta razón "a atacan e queren desgastala".
"Martiño (Noriega) atreveuse en 2015 e conseguiu desaloxar a corrupción e a vergoña do Pazo de Raxoi. Agora, temos a oportunidade de consolidar esta nova etapa e non retroceder ao pasado. Para continuar con políticas progresistas e transformadoras. Para continuar exercendo como capital feminista, democrática, dos coidados, diversa e plural. Para continuar sendo a máis galega das cidades", incide o texto.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.