Tres galardóns para 'The Widow' de Noelia Muíño e dous para 'Limbo' de Dani Viqueira no festival de Cans
Na animación, a peza escollida foi 'Soy una tumba', de Khris Cembe.
Por E.P. | PONTEVEDRA | 26/05/2019 | Actualizada ás 10:25
O Festival de Cans, que se celebrou na localidade pontevedresa de Cans, entregou na gala final do seu día grande, os premios correspondentes á súa 16 edición. O curto 'The Widow', de Noelia Muíño, logrou tres dos galardóns: mellor guión, mellor realización e dirección de fotografía para Asia Khmelova.
Mentres, 'Limbo', de Dani Viqueira, obtivo dous premios: mellor curtametraxe de imaxe real e mellor banda sonora orixinal para Germán Díaz, informou a organización nun comunicado.
Na animación, a peza escollida foi 'Soy una tumba', de Khris Cembe, cunha mención especial do xurado para 'Homomaquia', de David Fidalgo Omil. As categorías interpretativas protagonizáronas Marta Nieto, por 'De repente, la noche', e Jaime Olías, por 'O que medra por dentro'.
'Devalar', de Mar García, levouse o premio á mellor curtametraxe de 'FuraCans', e 'Caerán lóstregos do ceo', de Adrián Canoura, obtivo unha mención especial do xurado da categoría de non ficción.
Completa o palmarés o premio do xurado dos veciños á Mellor curtametraxe de imaxe real para 'O que precede á caída é branco', de Aldara Pagán, e a mención especial foi para 'De repente la noche', de Cristina Bodelón e Ignacio de Vicente.
