Prisión provisional para un veciño de Marín detido por varios roubos

Axentes de Policía Nacional das comisarías de Pontevedra e Marín detiveron a un home de 39 anos de idade como presunto autor dun roubo con forza nun domicilio, dun roubo con intimidación e de varios furtos. O xulgado decretou o seu ingreso en prisión provisional.

Segundo informaron fontes policiais, os feitos tiveron lugar o pasado luns cando un home presentou denuncia en dependencias policiais por un roubo en casa da súa nai, de onde levaron dúas cartillas bancarias, múltiples xoias e uns 100.000 euros.

A vítima é propietaria de dúas vivendas, e ten unha delas alugada por habitacións. Mentres limpaba as habitacións alugadas, alguén lle colleu as chaves da súa outro piso e rouboulle 100.000 euros en efectivo e numerosas xoias.

Iniciadas as pescudas, a Policía identificou ao presunto autor dos feitos, que resultou ser o mesmo home que xa fora identificado pola Policía Local de Marín como suposto responsable dun roubo con intimidación e varios furtos cometidos en establecementos desta localidade.

DETENCIÓN NUN HOTEL

O sospeitoso foi localizado nun hotel de Pontevedra, onde tiña reserva ata o 3 xuño, e onde estaba acompañado por unha muller. No rexistro, os axentes localizaron varias xoias que, segundo dixo a muller, estaba a gardar porque o home llo pedira. Así mesmo, relatou que tamén gardara, nun armario da súa casa, unha bolsa con 43.200 euros en billetes de 50 euros.

Os axentes solicitaron autorización xudicial para rexistrar a habitación do hotel, onde atoparon 2.690 euros en efectivo, e un xogo de chaves que o denunciante recoñeceu como as da vivenda da súa nai, onde se produciu o roubo. A Policía puido recuperar algunhas das xoias roubadas en diferentes locais de compravenda, e tamén recuperaron os 45.890 euros en efectivo.

O home foi detido, e púidose comprobar que tamén é o presunto autor de varios furtos ao descoido en establecementos de Marín e dun roubo con intimidación nunha xoiaría, cometido o 4 de maio. Nesa ocasión, tentou roubar unha caixa con xoias cando llas mostraba unha empregada, con quen pelexou. Tras prestar declaración en Comisaría foi posto a disposición do xulgado, que decretou o seu ingreso en prisión provisional.

[Grupovigo] Fwd: Nota E Fotos | Fonte: Europa Press