O 112 recomenda "hidratación extra" en colectivos de risco ante as elevadas temperaturas no sur de Galicia
Entre os consellos recomenda aproveitar as sombras cando saia á rúa e utilizar roupa lixeira.
Por Europa Press / Redacción | SANTIAGO DE COMPOSTELA | 31/05/2019 | Actualizada ás 13:02
O 112 Galicia, ante a previsión de que a zona do Miño en Ourense alcance a partir deste venres os 36 graos de temperatura, incide na importancia de "prestar atención" aos colectivos que poidan acusar máis os efectos da calor, como nenos, maiores e os enfermos crónicos, polo que aconsella "hidratación extra".
A través de redes sociais, o 112 Galicia recomenda consellos de protección como prestar atención a aqueles colectivos que poden acusar máis os efectos da calor porque "os nenos, os maiores e os enfermos crónicos necesitan extra hidratación". Ademais, resalta o 112 que "todos" os cidadáns deben "beber aínda sen ter sede para reducir así os efectos da calor na saúde". E aconsella "evitar as bebidas con cafeína, que fan aumentar a frecuencia cardíaca".
Entre os consellos recomenda o servizo de emerxencias aproveitar as sombras cando se salga á rúa, utilizar roupa lixeira, lentes de sol, chapeu e cremas de protección solar. Tamén advirte de que as comidas copiosas tardan máis en dixerirse e aconsella reducir a actividade física, así como en casa, durante o día, pechar xanelas e baixar as persianas.
O 112 recomenda pola noite, cando descendan as temperaturas, ventilar as vivendas e comprobar que os alimentos que se inxeren cumpran coas medidas de conservación necesarias.
