Por Europa Press / Redacción | SANTIAGO DE COMPOSTELA | 03/06/2019 | Actualizada ás 15:45
A viceportavoz do PP no Parlamento de Galicia, Paula Prado, destacou este luns ao presidente da Xunta e dos populares galegos, Alberto Núñez Feijóo, como un "magnífico presidente" e un "referente", polo que "a ninguén a cabe dúbida de que a súa substitución sería difícil".
Así respondía Prado aos xornalistas cando foi cuestionada polas declaracións deste domingo do vicepresidente da Xunta, Alfonso Rueda, que admitía que "a todo o PP lle gustaría que Feijóo volvese ser candidato e gañase por cuarta vez con maioría absoluta", aínda que argumentaba que "ser candidato é unha decisión que ten moitos compoñentes e un persoal moi importante", xa que, a diferenza do resto de partidos da oposición, o PPdeG aínda non elixiu ao seu candidato para as eleccións autonómicas de 2020.
"Escoitei ao vicepresidente e non escoitei algunha dúbida respecto diso", subliñou a viceportavoz popular, quen descartou que "este debate estea aberto".
Neste sentido, insistiu en que o presidente da Xunta na actualidade é Feijóo, polo que aínda o partido non está en "procesos de autonómicas", polo que indicou que "non é o momento para este debate". "É un magnífico presidente e loxicamente é difícil de substituír", sentenciou Paula Prado.
RESPOSTA DO PSDEG
Pola súa banda, preguntado sobre o futuro de Núñez Feijóo, o portavoz parlamentario do PSdeG, Xoaquín Fernández Leiceaga, subliñou que o cambio "se vai a producir" en Galicia con "independencia de quen sexa o candidato do Partido Popular".
"Con Feijóo ou sen Feijóo é un asunto do PP, alá eles, que fagan o que consideren mellor para os seus intereses", manifestou Leiceaga, que incidiu en que "hai unha demanda de cambio" na sociedade galega e o PSOE está "disposto a encabezar ese cambio". "Cremos que nos toca", apuntou.
E é que, conforme sinalou, "o tres resultados electorais encadeados indican" que o Partido Socialista está "en condicións de superar o Partido Popular en votos e encabezar unha alternativa progresista".
"O que queda moi claro é que as forzas da oposición en Galicia son nestes momentos moi maioritarias no sentir dos cidadáns e sería unha grave irresponsabilidade non estar á altura das circunstancias e non facer todo o posible para que iso se traslade a unha alternativa cando toque, nas próximas eleccións autonómicas, que ten que ser encabezada polo PSOE", apuntou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.