Como quere a rapazada que sexa un Día das Letras?
A RAG abre a participación de nenos e nenas a través dunha web para que os máis novos opinen sobre os homenaxeados o 17 de maio.
Por E.P. | SANTIAGO DE COMPOSTELA | 10/06/2019 | Actualizada ás 11:56
A Real Academia Galega mantén aberto ata o 22 de xuño o prazo para participar na terceira edición do concurso 'Contádenos o voso Día das Letras', que premiará os proxectos desenvolvidos en centros de educación infantil e primaria en relación con esta celebración, dedicada este ano a Antonio Fraguas.
Todos os traballos serán difundidos a través da web 'Primavera das Letras', creada pola institución para achegar de forma lúdica ao público máis novo a figura do autor homenaxeado o 17 de maio.
Cada colexio poderá presentar unha ou máis iniciativas centradas no Día das Letras Galegas de Antonio Fraguas. Os responsables deberán remitir un correo electrónico a contacto@primaveradasletras.gal cunha breve explicación da iniciativa e os links que recollan as actividades realizadas ou o material acreditativo.
Nas dúas primeiras edicións do concurso foron premiadas oito escolas: o CPI Virxe da Cela de Monfero, o EEI do Milladoiro de Ames, o CEIP Plurilingüe Anxo da Garda da Coruña, Antonio Fernández López de Sarria e Carlos Casares de Vilariño de Nigrán; o Colexio Plurilingüe Os Casais de Fene e o do Carballal de Marín; e o CRA Amencer de Ribadavia.
