Morre o condutor dun turismo tras saírse da vía en Muxía debido a unha posible indisposición
O condutor dun turismo faleceu na mañá deste luns despois de sufrir, supostamente, unha indisposición e saírse da vía co seu vehículo no termo municipal de Muxía.
Por E.P. | SANTIAGO DE COMPOSTELA | 10/06/2019 | Actualizada ás 13:42
O condutor dun turismo faleceu na mañá deste luns despois de sufrir, supostamente, unha indisposición e saírse da vía co seu vehículo no termo municipal de Muxía. Segundo informou o 112 Galicia, este sinistro ocorreu pasadas as 11,00 horas deste luns na estrada DP-2303 ao seu paso polo concello coruñés de Muxía.
Ao lugar desprazouse un equipo médico a bordo dun helicóptero, pero o persoal sanitario non puido facer nada por salvar a vida da persoa accidentada, indicaron as mesmas fontes. Precisamente, os labores de asistencia ao condutor obrigaron a interromper o tráfico, á altura do cruzamento coa parroquia de Montesiños.
Foi a chamada dunha persoa particular ao 112 Galicia a que alertou dun turismo parado. Por iso, o persoal do Centro Integrado de Atención ás Emerxencias pediu a colaboración do 061, que enviou á zona un equipo sanitario a bordo dun helicóptero, pero non puideron salvar a vida da persoa, que entrara en parada cardiorrespiratoria.
Este operativo completárono axentes da Garda Civil de Tráfico e de Policía Local, xunto a voluntarios de Protección Civil da localidade.
