O PSdeG: "Sería o peor dos mundos posibles que Jácome goberne Ourense e o PP a deputación"

O portavoz parlamentario do PSdeG, Xoaquín Fernández Leiceaga, apelou este luns a "reconducir a situación" para darlle aos ourensáns "o cambio" e a "rexeneración" que, ao seu xuízo, demandaron nas urnas, tanto no caso da deputación como no da capital da provincia.

Tal como sinalou Leiceaga en rolda de prensa, nas pasadas eleccións quedou "manifestado" que tanto na provincia de Ourense como no resto de Galicia os cidadáns "demandaron un cambio, unha rexeneración política". Ao seu xuízo, "o cambio non pasa por facer que Manuel Baltar sexa de novo o presidente da deputación", xa que perdeu a maioría absoluta e tivo un "retroceso notable".

Preguntado sobre como vería o Partido Socialista que o PP pactase con Democracia Ourensana e permitise que Gonzalo Pérez Jácome (DO) gobernase no concello de Ourense a cambio de manter a Baltar (PP) na deputación, Leiceaga indicou que sería "o peor dos mundos posibles".

Así, referiuse (aínda que sen nomealo) ás palabras do secretario xeral do PPdeG, Miguel Tellado, que este fin de semana volveu a insistir no criterio de que goberne a lista máis votada. "Non parece que Jácome sexa a lista máis votada en Ourense", ironizou Leiceaga, xa que DO situouse como a terceira forza política na cidade. Neste sentido, o PSdeG reiterou a necesidade de "un cambio" tanto na deputación como no concello que, segundo el, pasaría por afastar ao PP de ambas as institucións.

BNG

Na mesma liña referiuse a portavoz nacional do BNG, Ana Pontón, á situación de Ourense. Para ela, os cidadáns "deixaron unha mensaxe clara" que é, ao seu xuízo, "que non apoian o goberno do PP".

"O lóxico é unha alternativa que dese resposta á demanda dos veciños", indicou Pontón, que pretende aproveitar o "importante retroceso" dos populares, que perderon a maioría absoluta e que "deberían asumir que os ourensáns non avalaron a súa xestión".

Na deputación, Pontón indicou que se abriu a posibilidade de "deixar atrás o caciquismo que representa o Baltarismo". Con todo, lamentou que "hai outras forzas políticas" que parece que queren ser "bastón" para que Baltar continúe.

Sobre o resto de deputacións galegas, Ana Pontón preferiu "respectar os tempos" e centrarse nas corporacións municipais, pero insistiu en que o BNG "ten un compromiso claro". Por iso pediu "responsabilidade" a "outras" forzas políticas (referíndose ao PSdeG sen nomealo).

Así, mostrou a súa preocupación sobre os contactos que o PSOE e o PP tiveron en concellos "para impedir que se poidan levar adiante alcaldías do BNG", como son o caso de Fene e Viana do Bolo.

O PSdeG apela a 'reconducir a situación' para darlle aos ourensáns 'o cambio' e a 'rexeneración' que demandaron | Fonte: Europa Press