Un concerto de Mercedes Peón conmemorará dez anos da Torre de Hércules como Patrimonio da Humanidade

Un concerto de Mercedes Peón e unha proxección audiovisual nas paredes da Torre de Hércules conformarán parte dos actos programados para conmemorar o próximo 29 de xuño o décimo aniversario da Torre de Hércules como Patrimonio da Humanidade.

Os actos foron promovidos, conxuntamente, polo Consorcio de Turismo e Congresos e a Concellaría de Culturas do Concello da Coruña, que presentaron este martes a programación prevista.

Nela, xunto ao concerto de Peón e a proxección audiovisual, incluiranse tamén exposicións; recreacións históricas; visitas nocturnas ao monumento; charlas e actividades infantís.

Na presentación, o concelleiro de Culturas, José Manuel Sande, definiu esta conmemoración como "unha efeméride de interese histórico e cultural", cun programa acorde á xestión artística e cultural dos últimos anos, segundo expuxo.

Pola súa banda, o presidente do Consorcio, Alberto Lema, sinalou que este programa de actos "pon en valor" o patrimonio cultural e histórico da cidade.

Mentres, a xerente do Consorcio de Turismo, Lanzada Calatayud, subliñou, sobre a programación prevista, que se trata "dun evento de cidade, á vez que turístico". Por outra banda, lembrou que o calendario de actos comezou hai unhas semanas co ciclo de charlas 'A Torre da saudade'.