O alcalde de Ourense asegura que "todo está aberto" pero prefire un "goberno en maioría que evite o bloqueo"
Jesús Vázquez non descarta volver el á alcaldía.
- Vázquez, disposto a obedecer a Feijóo e renunciar á Alcaldía de Ourense para que o baltarismo siga gobernando a Deputación
- Feijóo non asume como fracaso ter enviado a cinco conselleiros como candidatos ás cidades
Por Europa Press / Redacción | SANTIAGO DE COMPOSTELA | 14/06/2019 | Actualizada ás 13:13
O alcalde de Ourense en funcións, Jesús Vázquez Abad, asegurou este venres que, a menos dun día de que se celebre a constitución do concello, "todo está aberto" e que "pode pasar calquera cousa nestas 24 horas", aínda que subliñou que el prefire un "goberno en maioría que evite o bloqueo continuo da institución".
Así o destacou Vázquez en rolda de prensa, onde indicou que "aínda se está falando" polo que non se sabe "o froito das negociacións". "Creo que ata última hora ou mañá probablemente non poidamos coñecer o resultado das conversacións", apostilou.
Jesús Vázquez lamentou que non chegase a bo porto a opción de permitir que as candidaturas máis votadas, polo menos en Galicia, puidesen gobernar (a pesar de que isto faría alcalde ao PSOE en Ourense e non ao PP).
Preguntado sobre se el podería volver á alcaldía, non o descartou xa que "a opción está aberta", polo que podería gobernar "a lista máis votada" ou tamén podería haber "un goberno en maioría". Para Vázquez, Ourense "necesita un goberno en maioría" para así "evitar o bloqueo permanente" do concello, do mesmo xeito que, ao seu xuízo, ocorreu no últimos catro anos.
Así, indicou que o PP podería pactar "con aquel que lle permita levar a cabo o seu programa ou maioritariamente parte del" e sinalou que cando haxa pacto "darase a coñecer á cidadanía".
