Por Europa Press / Redacción | A CORUÑA | 18/06/2019 | Actualizada ás 14:59
O informe 'Situación Galicia' elaborado por BBVA Reserch prevé que a economía galega cre 30.300 empregos ata finais de 2020 e reduza a taxa de paro ata o 10,5% ao final do seguinte ano.
Os resultados foron presentados este martes na Coruña, onde o economista xefe para España de BBVA Research, Miguel Cardoso, avanzou que as previsións apuntan a un crecemento do PIB para Galicia do 2,2% en 2019 e do 2% en 2020, o que "consolida" a desaceleración que informes doutros organismos xa habían adiantando.
En toda caso, Cardoso indicou que o crecemento podería "non ser tan positivo" debido a que hai unha "contorna máis incerta" que o que se prevía hai un ano, en vista ás tensións comerciais no panorama mundial e a "maior fragmentación" no Parlamento español.
A diferenza doutras comunidades, Galicia mostra unha "vantaxe comparativa" ao ter "estabilidade" no seu Goberno autonómico, que, segundo destaca Cardoso, puido aprobar os seus orzamentos.
FACTORES DE INCERTEZA
En todo caso, insistiu en hai un "panorama máis incerto" que pode facer que "o escenario non sexa tan positivo". Así, a nivel global, sinalou que os "riscos máis evidentes" son o aumento das tensións comerciais e os anuncios de maiores aranceis entre Estados Unidos e China.
Cardoso tamén fixo referencia á "inquietude" en Europa pola maior probabilidade de saída sen acordo do Reino Unido, os que afectaría as exportacións. E nese caso, advertiu, Galicia sairía "máis prexudicada" respecto doutras comunidades dada a maior contribución da demanda externa á actividade da economía galega.
Así as cousas, Galicia pechou 2018 cun crecemento do PIB do 2,7%, catro décimas menos que en 2017. Esta evolución da economía galega durante o pasado ano explícase "pola fortaleza da demanda interna", que compensou a debilidade das exportacións observadas a finais do pasado ano e que continúa a principios de 2019, sinala Cardoso.
O bo desempeño da demanda interna débese a varios factores, segundo informa Cardoso. Por unha banda, o consumo privado continúa dinámico, apoiado pola maior renda das familias, debido á "forte creación de emprego", e polo aumento da oferta de crédito.
O CRECEMENTO MANTENSE
"O crecemento manterase", indicou Cardoso, que explica que son varios os factores que contribuirán a manter o ritmo de crecemento da economía galega, cuxo PIB se prevé que creza un 2,2% en 2019 para desacelerarse ata o 2% en 2020.
De cumprirse o escenario previsto, poderíanse crear en Galicia 30.300 empregos ata finais de 2020, dos cales o 60% serían para o 2019, segundo sinalou Cardoso. Aínda que non puido precisar en que sectores haberá máis carga de traballo, si comentou que "unha parte importante" do emprego irá parar ao sector servizos.
De cara a 2020, adianta, o emprego pode crecer tamén no ámbito industrial, e é que "se esperan unha recuperación da Industria e a Construción" para o próximo ano.
A CORUÑA, Á CABEZA EN CRECEMENTO DE EMPREGO
Cardoso indicou que esta dinámica de crecemento no mercado laboral xa vén precedida polos datos rexistrados no ano 2018 e en primeiro semestre de 2019. Así, indicou que a recuperación do emprego é "heteroxénea" na comunidade galega, posto que A Coruña e a súa área de influencia presenta datos "máis positivos" que o resto de áreas urbanas de Galicia. Séguelle a área de Vigo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.