Ultimato da dirección de En Marea aos deputados críticos para que renuncien á súa acta

Dá de prazo ata o venres aos parlamentarios que apoiaron a Sande, quen non recoñecen a dirección do partido instrumental. Acusa a Pablo Iglesias de promover o "golpismo político" desde Madrid.

Por Europa Press / Redacción | Santiago de Compostela | 18/06/2019 | Actualizada ás 19:56

Comparte esta noticia

A dirección de En Marea deu un 'ultimato' aos deputados críticos co portavoz orgánico e parlamentario, Luís Villares, para que renuncien á súa acta se non desisten na súa intención de propor a José Manuel Sande para converterse en senador por designación autonómica e acatan o nome proposto pola cúpula do partido instrumental, Mariló Candedo.

En Marea
En Marea | Fonte: Europa Press

Deste xeito, a dirección de En Marea dá de marxe ata o venres (día no que, ás 13,30 horas, conclúe o prazo para rexistrar propostas para senador) para que os oito deputados que votaron a favor de Sande no proceso interno desenvolvido no seo do grupo acaten o nome de Mariló Candedo.

De non facelo, a cúpula do partido instrumental pedirá a estes parlamentarios (Antón Sánchez, Paula Quinteiro, Marcos Cal, Luca Chao, Julia Torregrosa, Carmen Santos, Ánxeles Cuña e Manuel Lago) que renuncien á súa acta por cometer unha "infracción moi grave" do código ético de En Marea e incumprir os compromisos adquiridos en 2016 para figurar nas listas das eleccións autonómicas.

Con todo, de maneira previsible estes deputados desatenderán a petición de dimisión da cúpula de En Marea, pois non recoñecen a dirección da organización que lidera Luís Villares como órgano superior ao que o grupo parlamentario se debe.

Deste 'ultimato' quedan excluídos os tres deputados afíns a Villares (Davide Rodríguez, Paula Vázquez Verao e Pancho Casal), Flora Miranda (votou á proposta da dirección) e Eva Solla (abstívose na votación interna).

Ademais, a dirección quere que, no caso de que os deputados sinalados decidan ignorar a súa petición e manteñan a súa acta, estes parlamentarios "abandonen" o grupo de En Marea "ao resultar evidente que non representan" a organización "nin teñen a intención de facelo".

SITUACIÓN SEN PRECEDENTES NA HISTORIA DO PARLAMENTO GALEGO

A coordinadora de En Marea, Ana Seijas, non concretou se Villares, na súa condición de portavoz parlamentario, seguirá adiante coa súa proposta para senadora a instancias da dirección de En Marea e rexistrará o nome de Candedo para o cargo antes das 13,30 horas do venres.

Isto obrigaría a pronunciarse á Mesa do Parlamento sobre a cal proposición outorga validez, se a dos deputados críticos (maioría de oito sobre 14 no grupo) ou a do portavoz do grupo. Trataríase, de confirmarse, dunha situación sen precedentes na historia da Cámara galega.

O pasado luns, fontes do Parlamento galego confirmaron que se esa é "a vontade maioritaria do grupo" deben "acreditala documentalmente a través dunha acta asinada polos asistentes á reunión" para trasladala á Mesa do Parlamento. Este trámite foi completado na mañá deste martes por dez deputados de En Marea, que asinaron unha acta no que formalizan o nome de Sande como proposta maioritaria do grupo para ser senador.

"Estes deputados débense a esta organización (En Marea)", aseverou Seijas, que instou os parlamentarios críticos a "reconsiderar a súa actitude" e aceptar a Candedo como proposta para senadora.

A situación aberta deixa ao bordo da ruptura definitiva ao grupo de En Marea, que podería ver como algún dos dous bloques nos que se dividen os seus representantes no Pazo do Hórreo acaba no grupo mixto.

Se isto ocorre, segundo Seijas, "a responsabilidade non será de En Marea" senón dos deputados "que non acatan" o que marca a dirección política "pola que se presentaron" nas eleccións autonómicas, cita na que a segunda forza no Parlamento concorreu como partido instrumental de adscrición individual.

ACUSA DE "GOLPISMO" A PODEMOS

Así as cousas, En Marea culpa da crise aberta no seo do grupo a dirección de Podemos e o seu líder estatal, Pablo Iglesias, ao que acusa de promover o "golpismo político" e o "transfuguismo" no grupo parlamentario.

O partido instrumental di sentirse "vítima" dunha "decisión tomada desde Madrid". "Podemos quixo quedar con todo, foi a decisión tomada en Vislategre II: destruír a casa común para quedar con todo. É a vella política da febre polos cargos", apostilou Seijas.

Nesta liña, insistiu en que "En Marea non é propiedade de Podemos nin de Pablo Iglesias", senón que é unha organización "na que só mandan as inscritas". A continuación, lembrou episodios previos vividos na vida interna do espazo político nos que afíns a Villares e críticos, especialmente Podemos, evidenciaron as súas discrepancias.

Así, citou o caso da deputada Paula Quinteiro, "amparada só por ser de Podemos", o apoio no Congreso ao proxecto "infame para Galicia" dos Orzamentos Xerais do Estado de 2018 —finalmente non aprobados— ou "a negación das prácticas ilícitas no censo de En Marea" durante as polémicas primarias nas que Villares referendou o seu liderado.

"O último episodio deste desprezo de Podemos cara a En Marea é o chamamento público de (Antón) Gómez-Reino de desatender unha decisión democrática de En Marea", subliñou Seijas en referencia a Mariló Candedo, proposta para senadora en base ás primarias para a configuración de listas para as xerais do pasado mes de abril, nas que En Marea e Unidas Podemos concorreron por separado.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 3 comentarios

3 Gamela

Esto é novamente outro Harakiri Político da esquerda galega ! https://youtu.be/0TOO-8HACsc Villares non entende que sen Podemos e EU non estarían sentados 14 no Hórreo? Os últimos resultados electorais foron contundentes con En Marea! (UnidasPodemos perdeu 3 e queda a parella de feito Yolanda & Toné) // EVA SOLLA astense porque así decidirá dende a Mesa mandar ao poleiro a Villares!!! Chercher la femme... esto non é feminismo é PODER puro e duro! Irene Montero & Yolanda Díaz & Eva Solla (un interesante triunvirato para tempos de miseria!)

2 Gustavo

Este Villares e os seus coleguiñas de Cerna, que xa desfixeron AGE no seu día, viven nun universo-espello ou invertido. Os que non representan a ninguén, e detentan a dirección formal desa marea tras anular unhas eleccións e facer outras sen garantía algunha, son eles. As urnas demostrárono, abrumadoramente. Xa desfixeron todo o que podían. A que esperan para mandalos á porra (GC corríxeme "á m....") dunha vez? Naturalmente, o resto da coalición tamén vaia por deus, pero o de Villares é un esperpento sen precedentes.

1 Ling Chung

Código ético. Pero se non teñen ética nin nada que se lle pareza