Galicia sofre o peor saldo vexetativo do Estado: 15.854 mortes máis que nacementos
Lidera a caída de nacementos (-10,3%) ata 16.550, a cifra máis baixa desde que hai rexistros.
- Cando Galicia tiña máis habitantes que Cataluña e Madrid: así foi a hecatombe demográfica no último século e medio
- Nace unha plataforma en liña para facilitar o control e o coidado dos maiores galegos
Por Europa Press / Redacción | | 19/06/2019 | Actualizada ás 13:31
Galicia sufriu en 2018 o peor saldo vexetativo de toda España, con 15.854 mortes máis que nacementos, segundo os datos provisionais que publica este mércores o Instituto Nacional de Estatística (INE).
En concreto, houbo 16.550 nacementos, a cifra máis baixa desde que hai rexistros. Galicia lidera a caída (-10,3%) a nivel estatal, seguida pola Rioxa (-9,2%). Este número de alumeamentos é de 5.500 menos que os máis de 22.000 que houbo en 2010.
Por provincias, A Coruña tivo o maior número de nacementos o ano pasado (7.129), seguida de Pontevedra (5.977), Lugo (1.958) e Ourense (1.486). Pola súa banda, os datos de falecementos non deixan de crecer ano tras ano na Comunidade e alcanzan xa os 32.404 en 2018 (442 máis que en 2017). Deste xeito, Galicia acumula tres décadas sen un saldo vexetativo positivo.
A seguinte comunidade con peores datos de saldo vexetativo é Castela e León (-14.199). Tan só tres autonomías (sen contar ás cidades autónomas) están en cifras positivas: Madrid (10.904), Murcia (3.448) e Baleares (1.946).
A ESPERANZA DE VIDA BAIXA PARA HOMES E SOBE PARA MULLERES
Con todo, a esperanza de vida continúa á alza en Galicia, posto que para os nados en 2018 sobe ata 83,10 anos (era de 83,07 en 2017). Mais hai diferenzas por sexos, xa que a de homes baixa a 80,13 anos (era de 80,15 anos en 2017), mentres que para as mulleres avanza ata 85,99 anos (85,90, en 2017).
DESCENSO DE MATRIMONIOS
O INE tamén publica este mércores a estatística relativa a matrimonios de 2018, no que houbo 8.609 en Galicia. Supoñen 678 ligazóns menos que en 2017 (-7,3%). Respecto da forma de casamento en 2018, é maioritario polo civil (6.647 vodas), seguido do rito católico (1.852 casos). Houbo 28 ligazóns por outro tipo de relixión, mentres que en 82 ligazóns non consta de que forma produciuse.
