Unanimidade parlamentaria para que Fomento una o polígono de Vimianzo coa autovía da Costa da Morte
Emprázase á Xunta a que remita a Fomento o estudo técnico realizado sobre a viabilidade da execución dunha nova conexión desde a vía de altas prestacións ata o parque empresarial de Vimianzo.
Por E.P. | SANTIAGO DE COMPOSTELA | 20/06/2019 | Actualizada ás 19:34
O Parlamento galego aprobou este xoves por unanimidade, tras unha proposta do PPdeG, demandar ao Ministerio de Fomento que execute a ligazón do parque empresarial de Vimianzo coa autovía da Costa da Morte.
Na comisión de Ordenación Territorial, aprobouse esta proposta na que se sinala que é "deber e responsabilidade" de Fomento a execución desta conexión ao tratarse dun parque empresarial dependente de Chan Empresarial do Atlántico, participada en máis dun 83% polo Ministerio.
Ademais, emprázase á Xunta a que, nada máis teña aprobado definitivamente o proxecto de prolongación da autovía, remita a Fomento o estudo técnico realizado sobre a viabilidade da execución dunha nova conexión desde a vía de altas prestacións ata o parque empresarial de Vimianzo. Respecto diso, o deputado popular Aurelio Núñez Centeo destacou que "conforme aos criterios técnicos determinouse que era viable unha ligazón na prolongación da autovía, á altura do punto quilométrico 5,500, para a conexión co polígono empresarial de Vimianzo".
Núñez Centeo apunta que "a Xunta ten confirmado que o proxecto de prolongación da autovía da Costa da Morte vai recoller o punto de entroncamento necesario para ese posible novo viario que conduza ao polígono de Vimianzo", o cal "deberá executar o Ministerio de Fomento". "Por parte da Xunta quedará todo preparado, mesmo previstas as expropiacións e movementos de terra necesarios, para a ligazón na autovía desta nova conexión co polígono de Vimianzo", asegura.
Nesta comisión tamén saíu adiante unha proposta de En Marea transaccionada pola que o Parlamento insta á Xunta a incluír na obra de mellora de estrada OU-636, entre A Pobra de Trives e Freixido, o repintado para permitir os adiantamentos. Esta proposta realízase "a condición de que se garanta o cumprimento das normas que regulan a distancia de visibilidade mínima necesaria en función da velocidade máxima permitida".
