Por E.P. | SANTIAGO DE COMPOSTELA | 21/06/2019 | Actualizada ás 14:58
O Defensor do Pobo Europeo admitiu a trámite a reclamación da plataforma de vítimas do accidente do tren Alvia ocorrido en Angrois en xullo de 2013 en relación ao acceso ao expediente sancionador que a Comisión Europea interpuxo contra España por incumprimento da normativa de seguridade ferroviaria.
En concreto, segundo un escrito ao que tivo acceso Europa Press, responsables da institución, en nome da defensora, Emily O'Reilly, escribiron á Comisión Europea "para ver se é posible resolver o asunto rapidamente", de acordo co principio "de tratar as solicitudes de acceso a documentos con prontitude". A asociación pedía acceso a estes documentos despois de serlle denegados pola Comisión con base en "unha serie de excepcións" da normativa comunitaria.
Ademais, na súa reclamación ante a institución europea, reclamaban unha investigación independente sobre o sinistro no que perderon a vida 80 persoas tendo en conta que "pasados seis anos aínda non se realizou". Lamentaba, neste sentido, recibir "diferentes xustificacións por parte da Comisión, pero a realidade e os feitos é que pasados seis anos aínda non se realizou unha investigación acorde á lexislación europea".
Deixaban claro, iso si, que "grazas aos diferentes organismos da UE", os afectados pola traxedia sentíronse "escoitados e tratados como verdadeiros cidadáns". Tras recibir a comunicación de admisión a trámite do seu escrito, a plataforma estima que "o tema da investigación vai noutra reclamación que van estudar".
EXPEDIENTE A ESPAÑA
En concreto, a Comisión Europea abriu un expediente sancionador contra España ao considerar que os seus procedementos de control da seguridade ferroviaria "non cumpren os requisitos" que esixe a normativa comunitaria.
Bruxelas ve "deficiencias" na forma en que a Comisión de Investigación de Accidentes Ferroviarios (CIAF) "analiza e investiga os accidentes e incidentes", segundo informou no seu día (en xaneiro deste ano) a institución comunitaria nun comunicado. Tamén observaba problemas nas "técnicas de supervisión" por parte da Axencia Estatal de Seguridade Ferroviaria (AESF).
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.