Por E.P. | Santiago de Compostela | 22/06/2019 | Actualizada ás 11:20
A Sección Sexta da Audiencia Provincial da Coruña --con sede en Santiago-- xulgará do 26 ao 28 de xuño, entre o mércores e o venres, a un grupo de presuntos ladróns que saquearon máis dunha vintena de casas en Compostela en 2013.
A Fiscalía solicita penas de entre catro e nove anos de cárcere para o nove acusados por delitos que pasan por roubo con forza en casas habitadas, receptación de efectos para o seu tráfico, tenencia ilícita de armas de fogo, depósito de municións de armas de fogo, así como pertenza a grupo criminal. Entre os seus roubos había televisores, portátiles, móbiles, cámaras de fotos, perfumes de marca, reloxos, videoconsolas, xoias e diñeiro en efectivo.
Tamén roubaron armas como unha escopeta, xunto a obxectos de toda índole pasando por ferros do pelo e rotuladores. Mesmo roubaran unha camiseta de adestramento do Dépor, que portaba un dos acusados no momento de ser detido e que foi devolta ao seu propietario.
Os roubos producíronse en máis dunha vintena de casas e pisos de Santiago, en rúas como Fernando III O Santo e a Praza de Praterías, entre outros. Polo menos nun dos casos, o acto foi frustrado por estar o inquilino dentro da vivenda.
MODUS OPERANDI
Segundo a fiscal, os acusados funcionaban como un grupo criminal, no que algúns se encargaban de localizar as vivendas propicias, outros abrían portas con plásticos como pancas, mentres uns recollían os obxectos --nun dos roubos empregaron unha furgoneta rotulada dunha empresa de transportes para levar os efectos subtraídos-- e outros os transportaban ou custodiaban.
Tamén estaba determinado quen exercía labores de vixilancia nos asaltos, así como os encargados de pór á venda os obxectos no mercado negro. Algúns dos obxectos foron recuperados en vivendas dos presuntos cacos en Santiago e O Milladoiro, Ames (A Coruña), antes da súa venda. Varios dos detidos contan con antecedentes penais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.