Piden oito anos de cadea para un funcionario en Pontevedra que cobraba por trámites
O empregado público da Subdelegación do Goberno de Pontevedra, supostamente recibiu en 2016 cantidades de ata 200 euros por executar expedientes de residencia.
Por E.P. | SANTIAGO DE COMPOSTELA | 23/06/2019 | Actualizada ás 12:30
O Ministerio Fiscal pide unha pena de oito anos de prisión e trece anos de inhabilitación para emprego público para un funcionario da Subdelegación do Goberno de Pontevedra que supostamente recibiu en 2016 cantidades de ata 200 euros por tramitar expedientes de residencia. Está acusado de delitos de suborno e falsidade en documento oficial. A vista xudicial celebrarase o luns 24 de xuño na Audiencia Provincial de Pontevedra.
Segundo recolle o escrito de Fiscalía, no ano 2016 iniciou, tramitou e finalizou catro expedientes de residencia, algúns de longa duración e outros de residencia temporal inicial, polos que non tiña dereito a percibir ningún tipo de retribución.
A AI.M.U., que tramitou unha solicitude de autorización de residencia temporal, "díxolle que tiña que facerlle un regalito e esta entregoulle 50 euros". Outra dos afectadas acudiu á Subdelegación portando 200 euros, que non chegou a entregar ao acusado porque foi atendida por outra funcionaria, o que provocou que o acusado lle chamase a atención.
A outro, N.RS.S. pediulle 150 euros, dos que 100 entregoullos na oficina e os 50 restantes na rúa. O afectado pensou que "o pago formaba parte das taxas a pagar pola tramitación do expediente". Ademais, tamén realizou cambios nas datas na solicitude de autorización presentada por AI.M.U., que foi quen presentou denuncia polos feitos o 29 de setembro de 2016.
A Fiscalía solicita penas de oito anos de prisión e 13 de inhabilitación especial para emprego ou cargo público, así como multas dunha cota diaria de 10 euros durante vinte meses polo primeiro delito e 10 euros diarios durante doce meses polo segundo delito. Ademais, deberá indemnizar a AI.M.U. en 50 euros e a N.RS.S. con 150 euros.
