Por Europa Press / Redacción | SANTIAGO DE COMPOSTELA | 25/06/2019 | Actualizada ás 18:42
A defensa do home acusado de violar dúas veces unha muller que padece problemas psquiátricos que a incapacitan de maneira total alegou que descoñecía a situación da vítima, xa que "non é manifesta a primeira ollada" e "ningunha das testemuñas na noite dos feitos lle advirtiu sobre a súa incapacidade".
O xuízo tivo lugar este martes na Sección Cuarta da Audiencia Provincial de Pontevedra. Os feitos remóntanse ao mes de maio de 2017 cando, na cidade de Pontevedra, o acusado supostamente facilitou bebidas alcohólicas á vítima para, segundo sostén Fiscalía, aproveitarse do seu estado de embriaguez e as súas limitacións psíquicas para violala.
A agresión, como sostén o Ministerio Público, produciuse na praza da Herrería. Ata alí foi arrastrada a muller por parte do acusado, que violou a vítima valéndose da súa maior corpulencia mentres a agredida profería berros e tentaba liberarse.
Fiscalía e acusación particular piden para o procesado unha condena de 13 anos e medio de prisión como autor dun delito continuado de violación a unha muller incapaz, mentres que a defensa solicita a libre absolución porque "non quedou acreditada" a violencia porque, mantén, as relacións sexuais foron consentidas.
Durante o xuízo, o acusado negouse a declarar, aínda que a súa defensa alegou que descoñecía a incapacidade da vítima, quen desde o ano 2007 ten recoñecido por un xulgado pontevedrés que é "absolutamente incapaz para rexer a súa persoa e administrar os seus bens" por padecer esquizofrenia hebefrénica e trastorno de inestabilidade emocional tipo límite.
Esta enfermidade prodúcelle alteracións da afectividade, vontade, perda da iniciativa e pensamento desorganizado, segundo acreditaron no xuízo unha traballadora do servizo de psiquiatría de Pontevedra e o informe pericial da médica forense.
A forense indicou durante a súa declaración que a deterioración cognitiva da moza "fai que a súa conduta se vexa anulada, que sexa facilmente manipulable e que, aínda que poida dar o seu consentimento, non entenda o que supón ese consentimento".
Segundo o escrito de acusación do Ministerio Público, despois de cometer a primeira agresión, o acusado cominou a vestirse á vítima e levouna ata o aparcadoiro da praza de Barcelos tirando do seu bolso, que acabou roto.
Unha vez no interior do aparcadoiro, introduciuna nun cuarto de ventilación, e alí de novo violouna mentres ela pedía que a deixase, choraba e berraba. Ela chegou a propinarlle polo menos unha puñada no nariz.
O acusado estivo en prisión provisional por estes feitos desde dúas semanas despois dos feitos ata o 16 de outubro de 2017, isto é, 146 días. Sobre el pesa, desde a súa saída de prisión, a prohibición cautelar de aproximarse a menos de 300 metros da súa vítima, o seu domicilio, lugar de traballo ou calquera outro que frecuente, así como a prohibición de comunicarse con ela por calquera medio.
A Fiscalía tamén pide que o acusado indemnice a vítima con 100 euros polas lesións causadas e con 75.000 euros polos danos morais causados.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.