O comité de empresa busca concretar este mércores con Alcoa a oferta de compra de Parter
As partes abordaron a posibilidade de "dar unha saída máis aló do 1 de xullo a aqueles traballadores que non queiran continuar na planta".
Por Europa Press / Redacción | SANTIAGO DE COMPOSTELA | 26/06/2019 | Actualizada ás 10:45
O comité de empresa de Alcoa na fábrica da Coruña tratará de "concretar" este mércores coa empresa o escenario que trasladou este martes o fondo suízo Parter, que, segundo fontes consultadas por Europa Press, mostrou a súa vontade de vir "para quedar" máis aló de dous anos e para a produción de aluminio de alto valor engadido para os sectores de automoción e aeronáutica.
En concreto, no encontro con Parter, Alcoa e o Ministerio de Industria, os representantes dos traballadores das factorías da Coruña e Avilés (que a multinacional do aluminio quere vender e para o que ten un preacordo co fondo suízo) foron informados de forma "máis detallada" do plan industrial deste último para ambas as plantas. "Falouse de mellorar as garantías laborais máis aló dos dous anos que están previstos, fixando uns obxectivos financeiros", segundo explicou o comité coruñés nun comunicado.
O mantemento do "100% do persoal" enfócase, de acordo co comité, "ao recomezo das series". Para iso, apunta que o Goberno entrego unha carta a Parter cunhas condicións de regulación que terán que baixar o prezo do megawatt entre 12 e 15 euros. Parter, pola súa banda, asegurou que mantería as series en estado de rearranque "o tempo necesario ata que o escenario sexa o adecuado para a súa viabilidade".
SAÍDA DE TRABALLADORES
Ademais, na cita deste martes, que se prolongou durante varias horas, as partes abordaron a posibilidade de "dar unha saída máis aló do 1 de xullo a aqueles traballadores que non queiran continuar na planta".
Este escenario é o que tentarán "concretar" os sindicatos "en seguintes reunións", a primeira, este mércores a partir das 16,00 horas coa empresa --é a que estaba prevista para o martes pola tarde pero que de novo foi aprazada, debido á duración da reunión con Parter--.
O prazo previsto para atopar unha solución ao conflito da multinacional, que quere vender as súas fábricas da Coruña e Avilés, culmina este domingo 30 de xuño. Este mércores, en declaracións á cadea SER recollidas por Europa Press, a ministra de Industria, Comercio e Turismo en funcións, Reyes Maroto, afirmou que "hoxe se está máis preto de solucionar a crise de Alcoa", despois de comprometer que o Goberno aprobará o estatuto do consumidor electrointensivo en canto se forme.
