Feijóo suxire que se pode presentar por cuarta vez como candidato do PP á Xunta

O presidente da Xunta, Alberto Núñez Feijóo, reivindicou este mércores as súas tres maiorías absolutas consecutivas para despois suxerir ao portavoz do PSdeG na Cámara, Xoaquín Fernández Leiceaga, que deixe aos galegos facer balance do seu Goberno nas urnas do 2020. "Ímonos a seguir vendo no Parlamento, se cadra, durante máis tempo do que vostede se cre", replicou ao socialista.

Así respondeu o titular do Executivo autonómico no hemiciclo despois de que Leiceaga lle preguntara sobre o "legado" que pretende deixar cando marche da Xunta. "Queda menos dun ano para acabar o seu terceiro e, espero, último mandato", esgrimiu.

A iso, Feijóo suxeriu que os galegos xa fixeron un balance "inapelable" nas urnas "despois de tres maiorías absolutas", e pediu ao portavoz socialista que se remita "ao balance dos galegos no ano 20".

Neste contexto no que xa se empeza a falar dos próximos comicios autonómicos e da xestión da Xunta para a próxima década, o tamén presidente do PP de Galicia deixou caer que continuará "máis tempo" do que o portavoz do PSdeG cre.

Durante a súa primeira intervención, Leiceaga evidenciou que a Comunidade "non necesita máis propaganda" como foi, segundo criticou, a reunión de todos os altos cargos do Executivo autonómico da semana pasada. E é que tras a súa última década á fronte da Xunta, Feijóo deixa unha Galicia "cada vez máis pequena en termos demográficos", o que constata, en palabras do socialista, "o fracaso das súas políticas". A iso sumou "os recortes" na Atención Primaria sanitaria e a "menor base laboral" na Comunidade: "Temos 90.000 ocupados menos en relación con 2008".

UNHA CRISE "AGRAVADA" POLO PSOE

Ante estas críticas, o líder popular rexeitou que a reunión mantida cos seus altos cargos na Administración sexa un acto propagandístico. Ademais, sacou peito de que o seu Goberno "tivo que xestionar a crise económica máis importante a nivel mundial desde mediados do século XX", que foi "agravada" polos executivos socialistas tanto en Galicia como no Estado na década anterior.

Para o portavoz do PSdeG, as liñas debuxadas pola Xunta para a próxima década son "un cóctel explosivo de improvisación estratéxica". "Agora ponse deberes para o 2027 e descobre que o acento hai que polo nas familias, nos mozos, na innovación e no territorio. Esa é a maior síntese do seu fracaso como presidente nestes anos", aseverou, para engadir que "non se vai a poder tapar unicamente con follas" do Diario Oficial de Galicia (DOG).