O Festival Portamérica, plataforma para previr e combater as agresións sexuais

A Deputación de Pontevedra retoma esta fin de semana, na celebración do Portamérica 2019, que terá lugar en Caldas de Reis, a súa campaña de igualdade para previr agresións sexuais nos festivais das Rías Baixas.

Con motivo da posta en marcha da terceira edición desta iniciativa, as técnicas de igualdade da Deputación reuníronse no Concello de Caldas con representantes da corporación, do Centro de Información á Muller, do Centro de Saúde, da Garda Civil e da Policía Local.

No encontro, conforme sinalou a Deputación, velarán polo normal desenvolvemento do evento e pola súa seguridade, as técnicas explicaron as novidades da iniciativa e o plan de traballo. Ademais, deron conta do informe de impacto de xénero 2018.

No recinto de Portamérica, a Deputación de Pontevedra instalará un punto de información no que estarán cinco "axentes de igualdade", que entregarán os folletos con contidos diferenciados para mulleres e homes, así como material promocional.

Como novidade, as guías da campaña editaranse tanto en galego como en castelán, con suxestións do público da pasada edición que proviña doutras comunidades autonómas.