A Xunta quere acabar co feísmo no Camiño de Santiago con 200.000 euros
Asina un convenio coa Fundación Juana de Vega para aplicar un plan no que se contará co asesoramento de especialistas da Escola Galega de Paisaxe.
Por Europa Press / Redacción | SANTIAGO DE COMPOSTELA | 04/07/2019 | Actualizada ás 19:36
O Consello da Xunta autorizou este xoves o convenio de colaboración entre o Goberno galego e a Fundación Juana de Vega, dotado de 200.000 euros, para impulsar medidas contra o feísmo no Camiño de Santiago.
O proxecto contará con accións para eliminar os elementos que deterioran a imaxe da Ruta Xacobea. Para iso, contarán co asesoramento de especialistas da Escola Galega de Paisaxe.
Como parte desta colaboración, a Fundación elaborará un manual de boas prácticas para fixar liñas de traballo recomendadas para futuras accións no ámbito paisaxístico do Camiño.
A achega da Xunta estará repartida en dúas anualidades (90.000 neste exercicio), e desenvolverase en diversas fases de traballo de campo e técnico.
