Por E.P. | SANTIAGO DE COMPOSTELA | 08/07/2019 | Actualizada ás 13:06
O Grupo Mixto propuxo que o limiar máximo para recibir un tratamento de fecundación asistida no Servizo Galego de Saúde (Sergas) se eleve ata os 45 anos como medida para paliar a crise demográfica que atravesa Galicia, un problema que, en palabras do portavoz parlamentario, Luís Villares, "non resolverá" o proxecto de lei de impulso demográfico da Xunta.
Villares ofreceu este luns unha conferencia de prensa que inaugurou o novo esquema das tradicionais rodas dos grupos con presenza no Parlamento de Galicia que dan arranque á semana mediática no plano político.
Así, a partir de agora, o encargado de abrir a xornada será o recentemente constituído Grupo Mixto, seguido polo BNG e, a continuación, os seus excompañeros do Grupo de En Marea, que ceden o seu sitio ao PSdeG como nova segunda forza na Cámara. O PPdeG seguirá pechando a rolda de conferencias de prensa.
O portavoz parlamentario do Grupo Mixto centrou a súa comparecencia ante os medios en criticar a lei de impulso demográfico que prepara o Goberno galego e que, segundo o maxistrado en excedencia, se caracteriza por "a falta de ambición", o que a converte en "propaganda electoral ás portas das autonómicas".
Deste xeito, Villares cre que "os datos" que arroxa Galicia, marcados pola perda de poboación, fan que a Xunta "non teña credibilidade para facer agora unha lei" neste ámbito pois "durante dez anos non fixeron nada" e o PP "é o principal responsable da sangría demográfica".
Neste sentido, o Grupo Mixto bota en falta na nova lei medidas que atendan "ao papel da muller", "a precariedade" do mercado laboral e "a perda de servizos públicos"; todos eles, segundo Villares, factores que provocan que a poboación de galega opte "por non ter fillos" ante "a falta de expectativas de futuro".
"Para cambiar isto fai falta un xiro total das políticas públicas, que sexa transversal e que cambie as paradigmas", incidiu o xuíz en excedencia, que teorizou con que a presentación desta lei por parte do Goberno de Alberto Núñez Feijóo evidencia que "recoñecen" que "non fixeron nada" durante o últimos dez anos para paliar a perda de poboación.
MEDIDAS
Así as cousas, o Grupo Mixto propón "tres directrices" sobre as que debería pivotar un texto lexislativo que afronte a problemática demográfica en Galicia: aplicar políticas "feministas" como "orientación básica", impulsar medidas que freen "a precariedade" na mocidade e mellorar os servizos públicos en virtude de "as plenas competencias" que ten a Xunta na materia.
Respecto disto último, expoñen que o sistema educativo para nenos de 0 a 3 anos sexa gratuíto a través dunha rede pública de escolas e que o catálogo de prestacións do Sergas eleve ata os 45 anos (actualmente está en 40) o limiar para as mulleres que queiran someterse a un tratamento de fecundación asistida.
Así mesmo, Villares tamén puxo sobre a mesa a "necesidade" de que se favoreza a conciliación como medida para aumentar a natalidade, "fundamentalmente" con políticas orientadas cara á muller. Por último, reclamou a derrogación das reformas laborais como vía para acabar "coa situación precaria" que padece a mocidade de Galicia, para quen tamén propón a creación dun plan de vivenda en aluguer.
Segundo Villares, todas estas medidas poderían "ter a categoría de rango de lei". "Se non se fai é que non hai intención de reverter a situación", apostilou Villares, para quen "un debate" sobre demografía que non se centra nas medidas expostas "non resulta crible".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.