Por Europa Press / Redacción | SANTIAGO DE COMPOSTELA | 19/07/2019 | Actualizada ás 15:57
O Comité Cidadán de Emerxencia mostrou a súa satisfacción pola sentenza do Tribunal Supremo (TS) que anula as licenzas outorgadas polo goberno en funcións de Mariano Rajoy e urxiu a execución do fallo. En concreto, o Supremo declarou nula a exención do trámite de avaliación de impacto ambiental que acordou o Consello de Ministros de 27 de maio de 2016 respecto da regasificadora de Mugardos (A Coruña).
O seu portavoz Manuel Rodríguez afirmou que esta sentenza "non é un papel calquera" e apoia a posición do Comité Cidadán de Emerxencia que considera que Reganosa "está asentada nun cúmulo de irregularidades". Así, lembrou que é a quinta vez que o Tribunal Supremo falla en contra da planta de gas e considerou que, nesta ocasión, a decisión fará que "todas as autorizacións que ten ata agora Reganosa vaian caendo como un castelo de naipes".
Manuel Rodríguez confirmou que o Comité Cidadán de Emerxencia incorporou esta sentenza xudicial ao recurso que actualmente ten interposto na Dirección Xeral de Política Enerxética, para que a fagan efectiva.
Para o Comité Cidadán de Emerxencia, a planta de Reganosa "non é necesaria" ao considerar que os gasodutos que existen actualmente en Galicia "son suficientes". Outro dos motivos que argumentaron é que a planta de gas situada en Mugardos "encarece os recibos da luz e do gas na comarca".
"IMPUNIDADE"
Manuel Rodríguez considerou que os gobernos do PP, tanto no Estado como na Xunta, deron "impunidade" a Reganosa". Así, sinalou que a pesar das catro sentencias previas do Tribunal Supremo, o goberno en funcións de Mariano Rajoy "adoptou unha decisión ilegal" ao conceder permisos a Reganosa "e déronlles continuidade".
Por iso, espera que o goberno de Pedro Sánchez "actúe en consecuencia", ao ser Reganosa "unha institución feita pola corrupción do PP" unha vez coñecida esta nova sentenza do Tribunal Supremo.
O portavoz da plataforma sinalou que o Estado sería "responsable" no caso dun accidente neste plan cunha capacidade letal de "120 bombas atómicas". "Sería unha catástrofe", advertiu antes de criticar que a Xunta realizase no seu día un seguro a Reganosa a pesar de saber que "ese non era un bo lugar", ao estar a planta de gas dentro da ría de Ferrol e con escasa distancia coa poboación.
A súa compañeira no Comité Cidadán de Emerxencia, Lupe Ces, afirmou que tras esta sentenza xudicial Reganosa é "un xigante con pés de barro", polo que solicitou ao Goberno central "que non permita que isto continúe, para que non sexa un problema da sociedade" e recalcou que a planta de gas "quedouse sen licenzas e se segue actuando farao en ilegalidade e haberá consecuencias políticas."
O Comité Cidadán de Emerxencia tamén confirmou nesta rolda de prensa que solicitaron reunións con todas as forzas políticas para facerlles chegar o contido desta sentenza do Tribunal Supremo, como tamén á Comisión Europea.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.