20 de cada 100 alumnos que rematan Primaria teñen unha competencia dixital baixa e só no 12% é alta

Unha investigación realizada polo grupo Stellae da Universidade de Santiago de Compostela (USC) alerta de que 20 de cada 100 alumnos de sexto curso de primaria teñen unha competencia dixital baixa. As investigadoras Adriana Gewerc e Esther Martínez explican que este estudo busca identificar a competencia dixital ao finalizar a educación primaria, así como a influencia desta aprendizaxe nos procesos de inclusión social.

A partir da análise dos resultados dunha proba realizada entre 764 nenos de toda Galicia, o grupo da USC conclúe que o 67% do alumnado posúe unha competencia de nivel medio, mentres que unicamente doce de cada dez alcanzan un nivel alto.

As persoas consultadas realizaron unha proba estruturada en cinco partes, cada unha referida a unha área de competencias distinta, composta por preguntas relacionadas co seu nivel de coñecementos e capacidades, así como por preguntas de carácter adicional. O cinco apartados aludían a información, comunicación, creación de contidos, seguridade e resolución de problemas no plano dixital.

RESULTADOS

Segundo indicaron as investigadoras, de media, o alumnado obtén na proba unha nota final de seis nunha escala de dez puntos, "aínda que atendendo aos coñecementos, suspende en tres do cinco áreas analizadas".

En concreto, non chegarían ao aprobado en información (nota media de 4,8), creación de contidos (4,6) e resolución de problemas (4,8). Fronte a isto, as autoras do estudo opinan que "falta pois un maior manexo de conceptos de coñecemento competenciais básicos".

Con todo, as puntuacións máis altas (por enriba do 7,5) están relacionadas coas actitudes do alumnado en todas as áreas da competencia dixital, especialmente na seguridade e comunicación. Ao respecto, as autoras consideran que os datos sinalan que "son maioría aqueles que son conscientes de como deben actuar, especialmente en cuestións de seguridade e comunicación".

XÉNERO E INFLUENCIA FAMILIAR

En canto aos posibles factores que inflúen na situación actual dos nenos a esta idade, as investigadoras inciden na localización do centro, o xénero dos consultados e os hábitos de uso ou nivel formativo da nai.

Así, respecto deste último, as puntuacións obtidas "non gardan relación co nivel formativo do pai, pero si co da nai". En concreto, o alumnado cuxa nai posúe estudos universitarios obtén mellores puntuais.

Ademais, desde o punto de vista do xénero, tamén destaca o feito de que as nenas obteñen mellores puntuacións, "non tanto por ter maiores coñecementos, senón por obter mellores rexistros en canto ás actitudes".

En relación á localización do centro, as provincias da Coruña e Lugo obteñen a mesma puntuación media de 6,2, "aínda que é na primeira onde hai maior proporción de alumnado cunha competencia alta, do 17%". Ourense é a provincia onde a competencia dixital é menor, coa metade do alumnado cun nivel baixo.

A investigación, denominada 'Competencia dixital en estudantes de educación obrigatoria. Contornas socio-familiares, procesos de apropiación e propostas de inclusión', contou cunha subvención do Ministerio de Economía, Industria e Competitividade.