A sociedade civil salva un novo castro
Mariña Patrimonio axuda a protexer un dos castros máis grandes da comarca sobre o que xa se construiron catro vivendas e un paseo marítimo.
Por Galicia Confidencial | Foz | 22/03/2012 | Actualizada ás 18:42
O pasado mes de novembro Mariñapatrimonio comunicoulle ao Servizo de Patrimonio Cultural da Xunta de Galicia a existencia dun novo xacemento arqueolóxico situado a 300m do casco urbano de Foz, no lugar do Carreiro.
Un xacemento, que tras a súa inspección polos arqueólogos de Patrimonio, foi incluída no Inventario de Xacementos Arqueolóxicos da Dirección Xeral de Patrimonio e que resultou ser un dos maiores castros da comarca. E é que o castro ten unha extensión de aproximadamente 6 hectáreas que ocupan todo unha peninsula.
Covas e ouro
Neste castro hai unha mina de ouro, segundo os veciños, que foi tapada no ano 1994 ao construír o paseo marítimo. A tradición oral conta, ademais, da existencia dunha cova no Pico do Castro de Foz a un quilómetro do Carreiro.
Sen embargo, este xacemento atopase afectado por varias infraestruturas que afectan significativamente o seu aspecto orixinal; unha estrada que danou boa parte do seu sistema defensivo, un paseo marítimo que tapou varios foxos e a construcción de catro vivendas unifamiliares no seu interior.
Con todo, O Carreiro mantén moitas hectáreas, presumiblemente intactas, que, segundo Mariña Patrimonio, “deben ser protexida”. Nunha das súas zonas ainda se poden ver varios muros das cabanas do castro, muíños e cerámica común de tradición indíxena. Tamén se atopan numerosos fragmentos de cerámica construtiva con armazón vexetal, vinculada con fornos posiblemente de actividade metalúrxica.
Máis fotos aquí.
