Rescatados catro tripulantes ingleses dun veleiro que naufragou en Cariño

Os catro tripulantes dun barco de recreo tiveron que ser rescatados despois de que o veleiro no que navegaban naufragase a noite do pasado venres no municipio coruñés de Cariño.

A tripulación foi asistida por unha embarcación de Salvamento Marítimo, que foi a que deu aviso do sucedido ao 112 Galicia ao fío das 23,05 horas.

Desde ese servizo de emerxencias alertaron aos efectivos de Urxencias Sanitarias de Galicia-061, que tiveron que atender unha das persoas que se atopaba no veleiro.

Todas elas eran de nacionalidade inglesa e as catro foron evacuadas na embarcación Salvamar Shaula ao porto da localidade de Cariño, no que unha delas, tras ser atendida polos profesionais sanitarios, foi trasladada a un centro hospitalario.

Ademais, o 112 Galicia tamén deu a coñecer a situación á Garda Civil e á Policía Local para intervir no incidente. No operativo de rescate tamén participou o Servizo de Gardacostas de Galicia, que mobilizou ata a zona do naufraxio ao helicóptero PESCA-II.