Realizan na Coruña unha cirurxía torácica pioneira a un neno de 3 anos cunha lesión tumoral no pulmón
Cirurxiáns do Hospital Quirónsalud extirparon dunha "forma minimamente invasiva, unha lesión tumoral de difícil acceso, ao estar localizada dentro do tórax, sen entrar por esta cavidade".
Por Europa Press / Redacción | SANTIAGO DE COMPOSTELA | 19/09/2019 | Actualizada ás 16:29
Cirurxiáns torácicos do Hospital Quirónsalud da Coruña realizaron "con éxito" unha intervención de "cirurxía pioneira" a un neno de tres anos que presentaba unha lesión tumoral no pulmón e que xa fora intervido na zona do tórax en dúas ocasións previas.
En concreto, a intervención levouse a cabo "mediante unha abordaxe cirúrxica subxifoidea, por enriba do diafragma, con cirurxía videotoratoscópica asistida", explicou o centro hospitalario coruñés.
O doutor Diego González Rivas, cirurxián torácico do Hospital Quirónsalud A Coruña que liderou a intervención, realizada o pasado 4 de setembro, explicou que a cirurxía consistiu en "extirpar dunha forma minimamente invasiva, unha lesión tumoral de difícil acceso, ao estar localizada dentro do tórax, sen entrar por esta cavidade".
"Cunha única incisión duns dous centímetros, nunha zona por enriba do diafragma, abordaxe subxifoidea, e mediante cirurxía videoasistida por toracoscopia chegamos a extirpala", engadiu o doutor.
Segundo comentou, optouse por esta técnica tras valorar o estado do paciente, que "xa sufrira dúas intervencións moi recentes na zona por cirurxía aberta (toracotomía) que facían moi arriscado realizar outra cirurxía convencional", sinalou.
"Este tipo de abordaxe en nenos é máis complexa que en adultos porque todo é moito máis pequeno e o material non está adaptado. Ao mesmo tempo, o centro hospitalario onde se realice debe dispor dunha serie de características, como grande experiencia en cirurxía pediátrica e anestesistas expertos que saiban manexar a vía aérea e facer entubación selectiva en nenos", comentou o doutor González Rivas.
"O resultado foi moi bo e o neno puido recibir o alta ás 24 horas, sen apenas dor, e regresou á súa casa para seguir o tratamento da súa enfermidade", destacaron por parte do centro hospitalario.
