Santiago, capital dos otorrinos
Máis de 1.500 otorrinolaringólogos reuniranse nun congreso en Santiago do 3 ao 6 de outubro
Por E.P. | SANTIAGO DE COMPOSTELA | 24/09/2019 | Actualizada ás 15:06
Santiago de Compostela converterase na capital da otorrinolaringoloxía coa celebración da 70 edición do Congreso da Sociedade Española de Otorrinolaringoloxía e Cirurxía de Cabeza e Pescozo (SEORL-CCC) que se celebrará do 3 ao 6 de outubro cuns 1.500 asistentes.
O Palacio de Congresos e Exposicións de Galicia acollerá a especialistas nacionais e internacionais nunha cita que terá como novidades a inclusión no programa científico de diseccións en directo en nariz e seos paranasais, oído e orofarinxe, ou a interacción cos asistentes mediante app, entre outras.
Ademais, esta edición inclúe a celebración do V Congreso da Academia Ibero-Americana de Otorrinolaringoloxía, "o que suporá unha oportunidade para intercambiar información científica con expertos procedentes de diversos países de Iberoamérica", destacaron os organizadores.
"Temos un programa moi dinámico e atractivo que abarca todas as áreas da otorrinolaringoloxía e cirurxía de cabeza e pescozo. Queremos demostrar o gran avance que tivo a especialidade en técnicas cirúrxicas", indicou o doutor Pablo Parente, coorganizador do 70 Congreso da SEORL-CCC.
