Eva Solla será a única candidata para as primarias de Esquerda Unida de cara as autonómicas
A comisión electoral de EU informa de que acabou o prazo de presentación de precandidaturas para o proceso e o único nome que se recibiu en tempo e forma foi o de Solla.
Por Europa Press / Redacción | SANTIAGO DE COMPOSTELA | 25/09/2019 | Actualizada ás 19:00
A coordinadora nacional de Esquerda Unida (EU) e vicepresidenta segunda do Parlamento galego, Eva Solla, será a única candidata ás primarias da formación para optar á Presidencia da Xunta de Galicia nas eleccións autonómicas de 2020.
Nun comunicado, a comisión electoral de EU informa de que acabou o prazo de presentación de precandidaturas para o proceso e o único nome que se recibiu en tempo e forma foi o de Eva Solla.
O pasado luns, a tamén deputada do Grupo Común da Esquerda lanzou a súa candidatura ás primarias da federación galega de EU de face ás autonómicas, unha cita coas urnas na que EU confía en manter a "confluencia" con outras forzas como Podemos Galicia e Anova.
"Considero humildemente que podo achegar grandes elementos de consenso. Tamén, como muller, estou segura de que temos que dar un paso adiante cara aos postos de responsabilidade", asegurou Solla.
Aínda que nunha entrevista radiofónica o pasado mes de agosto a deputada estatal por Galicia en Común Yolanda Díaz deixou a porta aberta a liderar o espazo político nas autonómicas previstas para 2020, finalmente non presentou candidatura ás primarias de Esquerda Unida.
