O PP expulsa do partido ao alcalde de Meaño por "pactar contraprestacións" salariais co PSOE

O PP de Pontevedra decidiu expulsar do partido ao alcalde de Meaño, Carlos Viéitez, por unha "falta moi grave de deslealdade" cara á formación despois de que os votos dos concelleiros populares de Meaño no pleno local facilitasen que o PSOE asuma o control da Mancomunidade do Salnés.

A decisión foi acordada este venres polo comité de dereitos e garantías do PP de Pontevedra e notificada ao propio Viéitez, que poderá recorrer a súa expulsión do partido ante o órgano nacional nun prazo de dez días.

A organización xustifica a súa decisión ao entender que o rexedor "pactou co PSdeG contraprestacións realtivas ao seu soldo e a nomeamentos" a cambio de "un posto decisivo" na mancomunidade, o que constitúe "unha falta moi grave por manifesta deslealdade ao partido e outra, tamén moi grave, por desobediencia ás instrucións dos órganos de goberno" da formación.

Deste xeito, consideran que Viéitez "desobedeceu claramente e sen xustificación ningunha" as instrucións da dirección provincial, que marcara a esixencia de presentar candidatura para lograr outro posto máis por Meaño na mancomunidade --ademais do seu como alcalde-- para así reter a presidencia do órgano, que ata agora recaía no rexedor de Vilanova, Gonzalo Durán.

"Non fai falta máis que analizar tamén outros puntos da acta do pleno extraordinario do concello, onde se aprobaron puntos relativos a retribucións, nomeamentos, etc.", engade o comunicado do PP de Pontevedra, que incide en que nestes documentos "pódese apreciar que existe un claro entendemento cos edís do PSdeG, pois ou votan a favor das propostas de edís do PPdeG ou se absteñen".

Alfonso Rueda e Alberto Núñez Feijóo. XUNTA