Animalistas denuncian que un can "malvive" encadeado durante as 24 horas do día nunha nave de Ourense
Os animalistas explican que esta práctica provoca non só problemas físicos aos animais, senón tamén "de socialización con persoas e outros seres vivos".
Por E.P. | OURENSE | 23/10/2019 | Actualizada ás 17:45
A Asociación Animalista Libera presentou este mércores unha denuncia administrativa contra os responsables de manter "encadeado durante todos os días" e as 24 horas a un can que "malvive" nunha coñecida nave comercial situada no termo municipal de Ourense.
A asociación lembrou que a Lei de Benestar Animal de 2017 sinala a prohibición da limitación continuada de movementos dos animais, como pode ser "o encadeamento perpetuo que sofren centos de cans en toda a provincia, e mesmo gatos", e contempla sancións de ata 5.000 euros, ao consideralo unha infracción de carácter grave.
Os animalistas explican que esta práctica provoca non só problemas físicos aos animais, senón tamén "de socialización con persoas e outros seres vivos", e "adoita levar aparelladas outras vulneracións" da normativa galega, como a falta de identificación con microchip, condicións hixiénico-sanitarias "cuestionables" ou carencia de atención veterinaria regular.
