Por D.J. | A Coruña | 24/10/2019 | Actualizada ás 23:21
Coruña Dixital, coordinado por Sergio Lago, amplía os seus horizontes con novas actividades, congresos e coa reactivación do Laboratorio de Innovación e Creación, un ciclo de encontros arredor da cultura audiovisual contemporánea, os novos medios e a transformación dixital.
O encontro pretende integrarse co tecido innovador da Coruña apoiando dende o mes de novembro distintas iniciativas impulsadas por colectivos e entidades que traballan no ámbito das TIC. Unha desas novidades será o AtlánticaConf, un congreso de divultación tecnolóxica coordinado por profesionais da cidade co apoio de empresas e da Universidade da Coruña.
A Domus tamén acollerá, o 9 de novembro, a oitava edición da Feira de Tecnoloxías Libres OSHWDem, organizada polo colectivo Bricolabs, un evento xa de referencia para o mundo maker. Nese mesmo mes, os días 22 e 23, celébrase o sexto congreso TADEGa, dirixido ao ámbito educativo, e centrado na tecnoloxía e a atención á diversidade.
Na presentación esta semana do encontro, o concelleiro de Cultura, Jesús Celemín, destacou a intención do concello de "contribuir a dar resposta ás novas demandas culturais dunha parte da cidadanía" cun programa dinamizador e que fomenta a participación activa da veciñanza.
O mes de decembro tomará protagonismo o Laboratorio Audiovisual de Innovación e Creación, o #LAIC, un ciclo de encontros arredor da cultura audiovisual contemporánea, os novos medios e a transformación dixital. Na edición de 2019, a protagonista será a edición dixital transmedia: narrativas para distintos formatos e dispositivos cunha participación activa pro parte das audiencias. Sergio Lago, comisario do programa, sinala que o #LAIC "estará moito máis vinculado á creación dixital transmedia e traballará coa comunidade técnica da cidade adicada á creación audiovisual, á programación informática e aos novos escenarios de realidade virtual, xa que temos grandes referencias na cidade neste ámbito".
A primeira das sesións terá lugar a mediados de decembro e continuará logo do Nadal, no centro Ágora, con actividades semanais ata finais de marzo.
En 2020 o programa continúa con máis iniciativas, entre as que cabe salientar un encontro galego sobre creación e narrativas dixitais no ámbito educativo e sociocultural. Para fomentar este sector, Coruña Dixital pon a disposición dos profesionais da docencia e o activismo social o seu Kit de Activación Dixital, que pode descargarse en kit.corunadixital.gal. Na web tamén se recollen entrevistas e arredor de 50 experiencias inspiradoras, que se irán ampliando ao longo do curso a través dunha convocatoria aberta. Outro ámbito de reflexión, en colaboración con outras entidades como as Bibliotecas Municipais da cidade, será o impacto da tecnoloxía sobre a sociedade actual.
A información sobre todas estas actividades, así como os recursos didácticos, publicarase tanto na web de Coruña Dixital (www.corunadixital.gal) como nas súas redes sociais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.