O Racing de Ferrol, elixido 'Ferrolán do ano 2019' no seu centenario
A distinción seralle entregada o 7 de xaneiro, cando tamén se imporán cinco insignias de ouro.
Por Europa Press / Redacción | SANTIAGO DE COMPOSTELA | 22/11/2019 | Actualizada ás 17:47
O club de fútbol Racing de Ferrol foi elixido 'Ferrolán do Ano 2019', nunha decisión tomada polos portavoces dos grupos municipais deste Concello, distinción que lle foi concedida no ano do seu centenario e que lle será entregada o próximo 7 de xaneiro, festividade de San Xiao, patrón desta cidade, nun acto que se desenvolverá ao mediodía no Teatro Jofre.
Este recoñecemento deuno a coñecer o alcalde da cidade naval, Ángel Mato, nunha comparecencia pública na que apuntou que o Racing de Ferrol "é un dos representantes máis destacados da cidade a nivel deportivo".
Ademais, unha das novidades da convocatoria deste ano foi que se aumentou o número de insignias de ouro a entregar, ao pasar do tres habituais a cinco.
Tamén por unanimidade dos portavoces de PP, PSOE, FeC e BNG decidiuse que son merecedores destas distincións o CEIP San Rosendo, no cinco aniversario deste centro educativo situado no barrio de Canido.
Teima Down, que cumpre 25 anos e é unha das entidades máis activas da cidade, foi tamén merecedora doutra das medallas, do mesmo xeito que o IES Leixa, centro educativo situado na zona de Catabois, e premio da Xunta no Día Internacional contra a Violencia de Xénero polos seus traballos de imaxes e vídeos sobre este problema.
RECOÑECEMENTO INDIVIDUAL
Os portavoces de Ferrol tamén quixeron realizar dúas distincións individuais, unha delas a título póstumo.
Así, José Leira López, licenciado en Ciencias Políticas e Socioloxía, e que foi profesor, coordinador e director de cursos, xornadas e másteres na Universidade da Coruña (UDC). As súas principais liñas de investigación relaciónanse coa cultura, o patrimonio e o turismo. Foi creador e director, desde 1995, do proxecto 'Aulas non Camiño', e faleceu hai unhas semanas de maneira repentina en Ferrol.
A outra galardoada será Paula Río Galdo, científica biomédica que recentemente gañou o premio á mellor investigadora do ano da Sociedade Europea de Terapia Xenética e Celular, polos resultados dun ensaio clínico de terapia xenética para as persoas afectadas pola anemia de Fanconi, e que é directora dun estudo de investigación onde se demostra que as células do sangue dos pacientes poden corrixirse utilizando unha nova estratexia de edición xenética.
