Por E.P. | SANTIAGO DE COMPOSTELA | 14/12/2019 | Actualizada ás 13:48
O secretario xeral do PPdeG, Miguel Tellado, reclamou ao Goberno de Pedro Sánchez que "cumpra cos seus compromisos" para que o AVE chegue a Galicia para o Xacobeo 2021. Así o sinalou na estación de trens de Santiago.
Tellado engadiu que "lamenta" que a visita a Galicia da presidenta de Adif, Isabel Pardo de Vera, se corresponda coa súa participación nun acto do PSdeG-PSOE e "non co anuncio da chegada da alta velocidade".
Denunciou ademais que "o único que saben" é que a intención do Goberno de España é que o AVE chegue ao límite de Galicia na primavera do 2020, o que "apunta a que" o tren non chegue para o Ano Santo.
Doutra banda, o secretario xeral do PPdeG quixo mostrar a "sorpresa" que lles produce que o fiscal delegado de Medio Ambiente, Álvaro García Ortiz, participe este sábado nun acto do PSdeG, porque considera que isto "pon en dúbida a neutralidade do seu cargo e a independencia xudicial".
Para finalizar, indicou que no partido están "preocupados" pola situación de Alcoa, xa que consideran que se non hai unha "intervención decidida" do Goberno de España a empresa pódese enfrontar a unha "situación complexa".
Tellado indicou que isto "poría en perigo ao redor de 5.000 empregos industriais" e esíxelle ao Goberno que "pense menos en Pedro Sánchez e máis nos españois".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.