Adegas Martín Códax estuda como evitar que a exposición á luz dane o viño

Ramón Bilbao, Adegas Martín Códax, Prilux Iluminación I+D e o Centro Tecnolóxico do Viño (Vitec) uníronse para desenvolver o proxecto de I+D Retasteled, que investiga o desenvolvemento e a aplicación de novas tecnoloxías LED para facer fronte á posible deterioración fotoquímica que pode afectar, especialmente, aos viños brancos, rosados e espumosos cando se expoñen á luz ultravioleta-visible convencional.

Mediante a instalación destes LEDs en adegas e lineais de venda, o proxecto Retasteled propón desenvolver alternativas tecnolóxicas, sustentables e innovadoras, que terminen con estas transformacións fotoquímicas, capaces de minguar a calidade organoléptica dos viños.

As luces dos LEDs son moito máis intensas e levan un consumo eléctrico moi inferior, o que ademais permitirá ás adegas optimizar os seus custos de produción e ser máis sustentables. Por outra banda, de cara aos produtores e comercializadores, preténdese que as novas luces LED non emitan nas lonxitudes de onda críticas para a redución da riboflavina.

Neste sentido, o obxectivo fundamental do proxecto consiste en desenvolver novas fontes de luz (baseadas na tecnoloxía LED) para a súa aplicación na industria vitivinícola, nas grandes superficies de venda e nas cadeas de distribución.

A substitución das actuais fontes de luz por unha iluminación que non afecte á calidade dos viños supón todo un reto tecnolóxico actual, cuxa resolución pode comportar tamén un claro beneficio ambiental e de aforro enerxético.

Pola súa banda, o Ministerio de Ciencia, Innovación e Universidades, na Convocatoria Retos de Colaboración 2017, financia esta innovadora iniciativa cun orzamento de máis de 750.000 euros, a través da Axencia Estatal de Innovación.