O deputado de Común da Esquerda Manuel Lago confirma a súa marcha do Parlamento e En Marea agarda así acadar a quinta acta

A seguinte da lista, Mariló Candedo, é afín ao portavoz de En Marea, Luís Villares.

Por Europa Press / Redacción | Santiago de Compostela | 20/01/2020 | Actualizada ás 20:35

Comparte esta noticia

O deputado de Común da Esquerda Manuel Lago formalizará este martes a súa marcha do Parlamento de Galicia para ocupar un cargo no Ministerio de Traballo que dirixe Yolanda Díaz.

O portavoz do Grupo Común da Esquerda no Parlamento de Galicia, Manuel Lago
O portavoz do Grupo Común da Esquerda no Parlamento de Galicia, Manuel Lago | Fonte: Europa Press

Segundo fontes consultadas, Lago comunicará oficialmente a súa saída da Cámara galega na mañá deste martes, xornada na que se reúne a Mesa do Parlamento antes da celebración da xunta de portavoces que elaborará a orde do día do próximo pleno ordinario.

A Mesa é o órgano da Cámara encargado de xestionar os escritos de renuncia dos deputados, polo que a substitución de Lago como deputado podería tomar posesión do seu asento no hemiciclo no pleno ordinario previsto para a semana que vén.

Deste xeito, a acta do economista vinculado ao sindicato Comisións Obreiras podería acabar no grupo mixto, xa que recaería en Mariló Candedo, seguinte da lista pola Coruña coa que o partido instrumental En Marea concorreu ás autonómicas de 2016.

Candedo, exdecana da Facultade de Ciencias da Educación da UDC, é afín ao portavoz de En Marea, Luís Villares, polo que, de asumir a acta de parlamentaria, previsiblemente solicitará a súa inclusión ao mixto, o que deixaría cun deputado menos a Común da Esquerda, que actualmente conta con dez.

De ser así, o mixto pasaría a estar integrado por cinco deputados, limiar que fixa o regulamento da Cámara autonómica para articular un grupo parlamentario. Con todo, o regulamento tamén regula como se conforma e, aínda que Villares e os seus poden tentalo e alegar, vetaría en principio que, aínda sumando, se constitúa como grupo propio.

E é que o artigo 23 do regulamento do Parlamento galego recolle que a constitución inicial de grupos parlamentarios farase dentro dos cinco días seguintes á sesión constitutiva do Parlamento, é dicir, ao arranque da lexislatura, mediante escrito dirixido á Mesa da Cámara.

No artigo 25 engádese que os deputados que adquiran a súa condición con posterioridade á sesión constitutiva do Parlamento deberán incorporarse a un grupo parlamentario (dos existentes) dentro dos cinco días seguintes a esta adquisición.

Xa no artigo 26 do regulamento faise constar que, iniciado un novo período de sesións, os deputados poderán incorporarse ao grupo parlamentario que desexen dos constituídos.

Precisa que "só para o suposto" de que "por calquera circunstancia se extinga ou finalizase a actividade do partido ou coalición electoral" polo que concorresen --non é o caso de En Marea, que segue funcionando como partido--, poderían constituír, "por unha soa vez", grupo ou grupos parlamentarios distintos se constituísen as esixencias previstas nesta norma.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 4 comentarios

3 Rodriguez De La Fuente

Ostras, que sorte o que pille o sillón que vai ter un par de soldiños ata que Feijoo disolva o Parlamento en Marzo. No me extrana que anden a mordisco Villares e Luca Chao.

2 xandasbolas

outro comunista mediocre e palanganeiro. so hai unha cousa peor que o comunismo i e o fascismo. e algo peor que os dous: a mediocridade.

1 Isidro

Unha pena que renuncie para ir de palanganas de Yoli Procesiones

1 Sidra

Típica maneira de falar dos que non din nada á cara. Que país de ananos,