A Universidade de Santiago crea unha cátedra de investigación para fomentar o estudo das enfermidades do ril

O reitor da Universidade de Santiago de Compostela (USC), Antonio López, e a presidenta da Fundación Renal Íñigo Álvarez de Toledo, Isabel Entero, acompañada pola súa directora xeral, Blanca Miranda, asinaron este luns no Reitorado o convenio de creación da Cátedra de Investigación Renal, orientada á promoción de actividades académicas e de investigación no ámbito da insuficiencia renal crónica.

A nova cátedra terá como obxectivos principais o fomento da investigación, a difusión e o coñecemento das investigacións, a organización de cursos, seminarios e actividades académicas de reflexión e debate, a formación de mozos investigadores e a inserción profesional dos estudantes da Universidade de Santiago.

Así mesmo, a cátedra impulsará iniciativas de I+D+i que se materialicen en estudos sobre mecanismos de progresión da insuficiencia renal, tecnoloxía de información aplicada aos procesos de tratamento da enfermidade, valoración e coidado dos aspectos psicolóxicos e psicosociais dos pacientes, e economía da saúde no campo da insuficiencia renal crónica.

No acto de firma a presidenta da Fundación Renal, Isabel Entero, destacou que "a nova cátedra supón un paso máis na aposta da Fundación Renal pola investigación nefrolóxica", que "foi unha prioridade para nós desde hai máis de 30 anos e na que levamos investidos máis de 21 millóns de euros", abundou.

Ademais, detallou esta aposta ao explicar que a cátedra é o resultado dos 25 anos de traballo do Instituto Reina Sofía de Investigación Nefrológica, así como doutros proxectos que viron a luz polo apoio desta Fundación, como a Red Renal de Nefrología e o seu Biobanco, ou a cátedra Reina Sofía de Investigación Renal, creada en 2016 coa Universidade Europea.

A Fundación Renal convoca, ademais, cada ano os premios de investigación nefrológica, que este 2020 cumpren o seu XXXII edición, e con carácter bienal financia proxectos de investigadores novos.